سابق افغان کرکٹر شاپور زدران کا جسدِ خاکی بھارت سے کابل پہنچ گیا، ساتھی کرکٹرز اشکبار

شاپور زدران طویل علالت کے بعد منگل کے روز نئی دہلی کے ایک اسپتال میں 38 برس کی عمر میں انتقال کر گئے تھے

ذیشان مہتاب جمعرات 9 جولائی 2026 11:28

سابق افغان کرکٹر شاپور زدران کا جسدِ خاکی بھارت سے کابل پہنچ گیا، ساتھی ..

کابل (اردو پوائنٹ تازہ ترین اخبار ۔ 9 جولائی 2026ء ) افغانستان کی قومی کرکٹ ٹیم کے سابق فاسٹ بولر شاپور زدران کا جسدِ خاکی بھارت سے کابل پہنچ گیا۔

افغان کرکٹ بورڈ کے مطابق سابق فاسٹ بولر شاپور زدران کا جسدِ خاکی بدھ کے روز بھارت سے کابل پہنچا، جہاں وہ انتقال سے قبل زیرِ علاج تھے۔

کابل انٹرنیشنل ائیرپورٹ پر شاپور زدران کے جسدِ خاکی کو وصول کرنے کے لیے بڑی تعداد میں اہلِ خانہ، رشتہ دار، دوست، حکومتی عہدیدار اور افغانستان کی کرکٹ ٹیم کے کھلاڑی موجود تھے۔

ایئرپورٹ پر خراجِ عقیدت پیش کرنے والوں میں قومی افغان ٹیم کے موجودہ اور سابق کھلاڑی بھی شامل تھے، جن میں راشد خان اور ابراہیم زدران نمایاں تھے۔

The mortal remains of the late Afghanistan fast bowler, Shapoor Zadran, arrived in Kabul today, where former and current national team players, ACB officials, members of his family, and distinguished dignitaries gathered at Kabul International Airport to receive him.

The funeral… pic.twitter.com/cMvDFGXrmS
— Afghanistan Cricket Board (@ACBofficials) July 8, 2026

جسدِ خاکی کی آمد کے موقع پر رقت آمیز مناظر دیکھنے میں آئے، جہاں ساتھی کرکٹرز نے تابوت کو احترام کے ساتھ ایک گاڑی تک پہنچایا۔

(جاری ہے)

اس موقع پر ہر آنکھ اشکبار تھی۔

یاد ر ہے کہ شاپور زدران طویل علالت کے بعد منگل کے روز نئی دہلی کے ایک ہسپتال میں 38 برس کی عمر میں انتقال کر گئے تھے۔

شاپور زدران کینسر کے مرض میں مبتلا تھے اور بھارت کے مقامی اسپتال میں زیر علاج تھے۔ افغانستان کے متعدد کھلاڑی بھارتی اسپتال میں شاپور زدران کی عیادت کے لیے جاتے رہے۔

شاپور زدران نے 44 ون ڈے، 36 ٹی ٹونٹی انٹرنیشنل میچز میں افغانستان کی نمائندگی کی۔

بائیں ہاتھ کے سابق فاسٹ بولر نے 2015ء کے آئی سی سی کرکٹ ورلڈ کپ میں اسکاٹ لینڈ کے خلاف افغانستان کی تاریخی پہلی فتح میں فیصلہ کن کردار ادا کیا تھا، جب انہوں نے فاتحانہ رنز بنا کر ٹیم کو یادگار کامیابی دلائی۔

شاپور زدران کے انتقال پر ساتھی کھلاڑیوں، سابق کرکٹرز، کرکٹ حکام اور شائقین کی جانب سے تعزیتی پیغامات کا سلسلہ جاری ہے۔