کم عمر بچوں پر سوشل میڈیا کی پابندیاں: دنیا بھر میں سخت قوانین، پاکستان میں بھی قانون سازی کا مطالبہ

پیر 13 جولائی 2026 22:39

سڈنی ، بیجنگ ، براز یلیا (اُردو پوائنٹ اخبارتازہ ترین - آن لائن۔ 13 جولائی2026ء) بچوں کی ذہنی، جسمانی اور اخلاقی نشوونما پر سوشل میڈیا کے بڑھتے ہوئے منفی اثرات کے پیشِ نظر دنیا کے مختلف ممالک کم عمر بچوں کے لیے سوشل میڈیا کے استعمال پر سخت پابندیاں اور ضابطے نافذ کر رہے ہیں۔ عالمی اداروں اور ماہرین کا کہنا ہے کہ آن لائن پلیٹ فارمز کے بے قابو استعمال سے بچوں کو ذہنی دباؤ، سائبر بٴْلیئنگ، نامناسب مواد اور دیگر ڈیجیٹل خطرات کا سامنا ہے، جس کے تدارک کے لیے مؤثر قانون سازی ناگزیر ہو چکی ہے۔

عالمی خبر رساں ادارے رائٹرز کے مطابق دنیا بھر میں آن لائن پلیٹ فارمز کو ضابطے میں لانے والے ممالک کی تعداد میں تیزی سے اضافہ ہو رہا ہے، جبکہ مختلف حکومتیں بچوں کے تحفظ کے لیے سخت قوانین متعارف کرا رہی ہیں۔

(جاری ہے)

عالمی نشریاتی ادارے سکائی نیوز کے مطابق آسٹریلیا نے 16 سال سے کم عمر بچوں کے سوشل میڈیا استعمال پر پابندی عائد کر دی ہے۔ قانون کے تحت اگر سوشل میڈیا پلیٹ فارمز کم عمر صارفین کو روکنے میں ناکام رہے تو انہیں 49.5 ملین ڈالر تک جرمانے کا سامنا کرنا پڑ سکتا ہے۔

رپورٹ کے مطابق چین کے سائبر اسپیس ریگولیٹر نے مائنر موڈ پروگرام کے تحت ڈیوائس لیول پابندیاں اور ایپس کے لیے خصوصی قوانین نافذ کیے ہیں تاکہ بچوں کی آن لائن سرگرمیوں کو محفوظ بنایا جا سکے۔اسی طرح انڈونیشیا نے تقریباً 70 ملین بچوں کے تحفظ کو مدنظر رکھتے ہوئے 16 سال سے کم عمر بچوں کے سوشل میڈیا استعمال پر پابندی عائد کی ہے، جبکہ برازیل نے 16 سال سے کم عمر صارفین کے سوشل میڈیا اکاؤنٹس کو قانونی سرپرست سے منسلک کرنا لازمی قرار دیا ہے۔

دوسری جانب ترک نشریاتی ادارے ٹی آر ٹی کے مطابق ترکیہ نے 15 سال سے کم عمر افراد کے لیے سوشل میڈیا کے استعمال پر پابندی کے ساتھ مؤثر عمر کی تصدیق کا نظام بھی لازمی قرار دیا ہے۔ماہرین کا کہنا ہے کہ کم عمر بچوں کو آن لائن استحصال، نامناسب مواد اور دیگر ڈیجیٹل خطرات سے محفوظ رکھنے کے لیے مختلف ممالک کے یہ اقدامات مثبت پیش رفت ہیں۔ ان کے مطابق پاکستان میں بھی بچوں کے تحفظ کو یقینی بنانے کے لیے عالمی طرز پر آن لائن سرگرمیوں کی نگرانی، عمر کی مؤثر تصدیق اور سوشل میڈیا کے ذمہ دارانہ استعمال سے متعلق جامع قانون سازی وقت کی اہم ضرورت بن چکی ہے۔