بلاول بھٹو وزیراعلیٰ سندھ بنیں، پھر وزیراعظم بھی بن سکتے ہیں،ایاز میمن موتی والا

پیر 20 جولائی 2026 21:40

کراچی(اُردو پوائنٹ اخبارتازہ ترین - این این آئی۔ 20 جولائی2026ء) کراچی تاجر الائنس کے چیئرمین و بانی عام آدمی پاکستان، ایاز میمن موتی والا نے ایک بار پھر اپنے منفرد سیاسی بیان سے توجہ حاصل کر لی۔ انہوں نے کہا کہ اگر سابق وزیراعظم نواز شریف کی صاحبزادی اور موجودہ وزیراعظم کی بھتیجی مریم نواز پنجاب کی وزیراعلیٰ بن کر صوبے کی تقدیر سنوار سکتی ہیں تو بھٹو خاندان کے نواسے، شہید محترمہ بے نظیر بھٹو کے صاحبزادے اور موجودہ صدرِ مملکت کے صاحبزادے بلاول بھٹو زرداری بھی سندھ کے وزیراعلیٰ کیوں نہیں بن سکتے۔

ایاز میمن موتی والا نے کہا کہ بلاول بھٹو زرداری کو سندھ کی ترقی کے لیے وسائل کی کمی کا سامنا نہیں ہوگا کیونکہ سندھ کے عوام ہر کسی پر شک کر سکتے ہیں مگر بلاول بھٹو کی نیت پر نہیں۔

(جاری ہے)

ان کے بقول بلاول بھٹو بعد میں بھی وزیراعظم بن سکتے ہیں، جیسے میاں شہباز شریف پہلے وزیراعلیٰ پنجاب رہے اور بعد ازاں وزیراعظم بنے۔انہوں نے کہا کہ اگر کسی وجہ سے بلاول بھٹو کو وزیراعلیٰ سندھ بنانا ممکن نہیں تو کم از کم کراچی کو ڈی ایچ اے طرز کے مؤثر انتظامی نظام کے حوالے کر دیا جائے تاکہ شہر کے دیرینہ مسائل کا مستقل حل نکالا جا سکے۔

ایاز میمن موتی والا نے مزید کہا کہ گزشتہ کئی دہائیوں سے مسلسل وزیراعلیٰ رہنے والوں کی کارکردگی سے سندھ کے عوام سخت مایوس ہیں۔ ان کا کہنا تھا کہ "سب اچھا ہی" کی رپورٹس نے سندھ کو تباہ حال کر رکھا ہے، جبکہ عوام آج بھی بنیادی سہولیات، صاف پانی، بہتر تعلیم، صحت، روزگار اور انفراسٹرکچر جیسے مسائل سے دوچار ہیں۔انہوں نے کہا کہ ان کی رائے میں بلاول بھٹو زرداری سے بہتر وزیراعلیٰ سندھ کوئی دوسرا نہیں ہو سکتا، اور اگر انہیں صوبے کی قیادت سونپی جائے تو سندھ ترقی، خوشحالی اور بہتر طرزِ حکمرانی کی نئی راہ پر گامزن ہو سکتا ہے۔