پی ایس 30 خیرپور-V کا انتخابی میدان سج گیا، 17 میں سے 9 امیدوار دستبردار، صرف 8 امیدوار مدِمقابل

جمعرات 30 جولائی 2026 22:42

خیرپور (اُردو پوائنٹ اخبارتازہ ترین - این این آئی۔ 30 جولائی2026ء) سندھ اسمبلی کے حلقہ پی ایس 30 خیرپور-V کے ضمنی انتخاب کے لیے انتخابی سرگرمیاں فیصلہ کن مرحلے میں داخل ہوگئی ہیں۔ ریٹرننگ افسر نے انتخابی شیڈول کے مطابق فارم 33 جاری کر دیا، جس کے بعد میدان میں رہ جانے والے امیدواروں اور ان کے انتخابی نشانات کی حتمی فہرست سامنے آگئی۔ انتخابی عمل کے دوران مجموعی طور پر 17 امیدواروں نے قسمت آزمائی کے لیے کاغذات نامزدگی جمع کرائے تھے، تاہم جانچ پڑتال اور دستبرداری کے مراحل مکمل ہونے کے بعد 9 امیدوار انتخابی دوڑ سے باہر ہوگئے، جس کے نتیجے میں اب صرف 8 امیدوار عوامی حمایت حاصل کرنے کے لیے میدان میں موجود ہیں۔

جاری کردہ فارم 33 کے مطابق پاکستان پیپلز پارٹی پارلیمنٹیرینز کے امیدوار اسفندیار خان کھرل کو تیر کا انتخابی نشان الاٹ کیا گیا ہے، جبکہ باقی سات امیدوار آزاد حیثیت میں انتخاب لڑیں گے۔

(جاری ہے)

آزاد امیدواروں میں راحیل کریم کھرل (بطخ)، سید تصور مہدی حسن شاہ (طوطا)، سید فہد علی شاہ جیلانی (میز)، شاہ حسن کھرل (بوتل)، غلام علی (ہینڈ پمپ)، غلام عمر (وہیل چیئر) اور محمد موسیٰ برڑو (کمپیوٹر) کے انتخابی نشانات بھی جاری کر دیے گئے ہیں۔ الیکشن شیڈول کے مطابق پی ایس 30 خیرپور-V میں 16 اگست 2026 کو صبح 8 بجے سے شام 5 بجے تک پولنگ ہوگی، جہاں ووٹرز اپنے حقِ رائے دہی کا استعمال کرتے ہوئے اپنے نمائندے کا انتخاب کریں گے۔