سپورٹس ڈیپارٹمنٹ کے زیر اہتمام انٹر ڈسٹرکٹ انڈر 23 بیڈمنٹن چیمپئن شپ کا انعقاد

سرگودھا (اُردو پوائنٹ اخبارتازہ ترین - اے پی پی۔ 31 جولائی2026ء) وزیرِ اعلیٰ پنجاب مریم نواز شریف کے وژن اور صوبائی وزیرِ کھیل و توانائی فیصل ایوب کھوکھر کی سرپرستی میں یوتھ افیئرز اینڈ سپورٹس ڈیپارٹمنٹ پنجاب کے سالانہ سپورٹس کیلنڈر کے تحت ڈویژنل سپورٹس آفس سرگودھا کے زیرِ انتظام سرگودھا ڈویژن انٹر ڈسٹرکٹ (مرد و خواتین ) انڈر 23 بیڈمنٹن چیمپئن شپ 2026ء اسپورٹس جمنازیم سرگودھا میں شاندار انداز میں منعقد ہوئی۔

چیمپئن شپ میں سرگودھا ڈویژن کے چاروں اضلاع سرگودھا، بھکر، خوشاب اور میانوالی سے انٹر تحصیل مقابلوں میں کامیابی حاصل کرنےوالے بہترین مرد و خواتین کھلاڑیوں نے اپنی اپنی ٹیموں کی نمائندگی کی۔ افتتاحی تقریب کے مہمانِ خصوصی چیف انجینئر نیسپاک سرگودھا شمروز خان تھے۔

(جاری ہے)

ایونٹ کے دوران مردوں اور خواتین کےٹیم ایونٹس،سنگلزاورڈبلز مقابلوں میں انتہائی سنسنی خیز اور دلچسپ مقابلے دیکھنے کو ملے۔

مردوں کے ٹیم ایونٹ میں ضلع سرگودھا نے شاندار کھیل کا مظاہرہ کرتے ہوئے چیمپئن شپ اپنے نام کی جبکہ ضلع میانوالی رنر اپ رہا۔ خواتین کے ٹیم ایونٹ میں بھی ضلع سرگودھا نے ضلع بھکر کو شکست دے کر چیمپئن ہونے کا اعزاز حاصل کیا۔مردوں کے سنگلز فائنل میں بھکر کے احمد نیازی نے سرگودھا کے طاہر سلطان کو شکست دی جبکہ خواتین کے سنگلز فائنل میں سرگودھا کی ثنا رمضان نے بھکر کی ایمان کو ہرا کر ٹائٹل اپنے نام کیا۔

مردوں کے ڈبلز مقابلے میں بھکر کے احمد اور حسیب کی جوڑی نے سرگودھا کے کاشان اور سلطان کو شکست دی، جبکہ خواتین کے ڈبلز میں بھکر کی ایمان اور مریم نے سرگودھا کی ثنا اور عائشہ کو ہرا کر کامیابی حاصل کی۔چیمپئن شپ میں مجموعی طور پر زیادہ تر ٹرافیاں، اور انفرادی اعزازات سرگودھا کے کھلاڑیوں کے حصے میں آئے، جس پر ڈویژنل سپورٹس آفیسر رانا ندیم انجم، ڈسٹرکٹ سپورٹس آفیسرز اور دیگر مہمانوں نے ڈسٹرکٹ سپورٹس آفیسر سرگودھا میڈم صائمہ منظور کو خصوصی مبارکباد پیش کی۔

مقررین نے کہا کہ صائمہ منظور کی محنت، بہترین منصوبہ بندی، کھلاڑیوں کی مسلسل رہنمائی اور کھیلوں کے فروغ کے لیے انتھک کاوشوں کے باعث سرگودھا کے کھلاڑی نمایاں کامیابیاں حاصل کر رہے ہیں، جو پورے ضلع کے لیے باعثِ فخر ہے۔بعد ازاں تقسیمِ انعامات کی پروقار تقریب منعقد ہوئی، جس میں ڈویژنل سپورٹس آفیسر رانا ندیم انجم، ڈسٹرکٹ سپورٹس آفیسر سرگودھا صائمہ منظور اور ڈسٹرکٹ سپورٹس آفیسر بھکر نے کامیاب کھلاڑیوں اور آفیشلز میں ٹرافیاں اور سووینئرز تقسیم کیے۔

اس موقع پر سرگودھا کے انٹرنیشنل بیڈمنٹن کھلاڑی محمد رضوان نے اپنے سپورٹس برانڈ وکٹر کی جانب سے باصلاحیت کھلاڑیوں میں شرٹس اور ریکٹس بھی تقسیم کیے۔ اپنے خطاب میں ڈویژنل سپورٹس آفیسر رانا ندیم انجم نے کہا کہ حکومت پنجاب اور سپورٹس ڈیپارٹمنٹ نوجوان کھلاڑیوں کو اپنی صلاحیتیں منوانے کے لیے بہترین مواقع فراہم کر رہے ہیں۔ ایسے صحت مند اور معیاری مقابلوں سے نئی صلاحیتیں سامنے آئیں گی جو مستقبل میں پنجاب اور پاکستان کا نام روشن کریں گی۔

تقریب میں تحصیل سپورٹس آفیسرز عظمت اقبال، شہریار سیال، سجاد حیدر، طیب بشیر (ایڈمنسٹریٹر)، فرحت عباس (ڈویژنل کوچ)، نیشنل اتھلیٹ علی، ڈائریکٹر سپورٹس ریڈر کالج جنید خان، حیدر اور ویمن کوچ علیزے سمیت کھیلوں سے وابستہ شخصیات کی بڑی تعداد بھی موجود تھی۔