پاکستان ٹوبیکو بورڈ کا کریک ڈاؤن، چارسدہ تنگی میں غیر قانونی مرکز اور فالکن ٹوبیکو کمپنی کا پرچیز سینٹر سیل

جمعہ 31 جولائی 2026 20:54

پشاور (اُردو پوائنٹ اخبارتازہ ترین - اے پی پی۔ 31 جولائی2026ء) چیئرمین پاکستان ٹوبیکو بورڈ، محمد شاہد حسین کی ہدایات پر غیر قانونی تمباکو خریداری کے خلاف جاری مہم کے تحت ڈپٹی ڈائریکٹر مارکیٹنگ، پاکستان ٹوبیکو بورڈ، شفاعت احمد مہر نے گورنر انسپکشن ٹیم (GIT) چارسدہ کے ہمراہ ضلع چارسدہ کے علاقے تنگی میں کارروائی کرتے ہوئے ایک غیر قانونی تمباکو خریداری مرکز کو سیل کر دیا۔

تر جمان پاکستان ٹوبیکو بورڈ پشاور کے مطابق اس موقع پر ڈپٹی ڈائریکٹر مارکیٹنگ نے غیر قانونی خریداری میں ملوث افراد کو سخت پیغام دیتے ہوئے کہا کہ پاکستان ٹوبیکو بورڈ تمباکو کاشتکاروں کے حقوق کے تحفظ کے لیے ہر ممکن اقدامات جاری رکھے گا اور تمباکو مارکیٹنگ رولز کی خلاف ورزی کسی صورت برداشت نہیں کی جائے گی۔

(جاری ہے)

اسی سلسلے میں فالکن ٹوبیکو کمپنی، چارسدہ کے خریداری مرکز کا بھی معائنہ کیا گیا۔

معائنے کے دوران خریداری کا ریکارڈ درست نہ ہونے، پاکستان ٹوبیکو بورڈ کو مطلوبہ ریکارڈ فراہم نہ کرنے اور تمباکو مارکیٹنگ رولز کی خلاف ورزی ثابت ہونے پر مذکورہ خریداری مرکز کو بھی فوری طور پر سیل کر دیا گیا۔چیئرمین پاکستان ٹوبیکو بورڈ، محمد شاہد حسین نے تمام اضلاع میں تعینات فیلڈ اسٹاف کو ہدایت جاری کی ہے کہ غیر قانونی تمباکو خریداری کی مؤثر نگرانی کو یقینی بنایا جائے اور قانون کی خلاف ورزی کرنے والے عناصر کے خلاف بلاامتیاز کارروائی عمل میں لائی جائے تاکہ تمباکو مارکیٹنگ کے نظام میں شفافیت برقرار رہے اور کاشتکاروں کے حقوق کا ہر صورت تحفظ یقینی بنایا جا سکے۔