Live Updates

جماعت اسلامی کا دھرنا مہنگائی، پیٹرولیم لیوی اور کے الیکٹرک کی لوڈشیڈنگ کے خلاف ہے، منعم ظفر

حکومت شاہ خرچیاں ختم نہیں کر رہی، شہری ٹیکس دینے کے باوجود بنیادی سہولتوں سے محروم ہیں، امیر جماعت اسلامی کراچی

جمعرات 20 اگست 2026 17:32

کراچی (اُردو پوائنٹ اخبارتازہ ترین - این این آئی۔ 20 اگست2026ء) امیر جماعت اسلامی کراچی منعم ظفر نے کہا ہے کہ جماعت اسلامی کا دھرنا مہنگائی، پیٹرولیم لیوی اور کے الیکٹرک کی ظالمانہ لوڈشیڈنگ کے خلاف ہے، حکومت اپنی شاہ خرچیاں ختم کرنے کے بجائے شہریوں پر ٹیکسوں کا بوجھ بڑھا رہی ہے۔پریس کانفرنس سے خطاب کرتے ہوئے منعم ظفر نے کہا کہ دھرنے میں نوجوانوں، خواتین اور بچوں کی شرکت خوش آئند ہے۔

انہوں نے دعویٰ کیا کہ 380 ارب روپے کا پیٹرول بیوروکریسی کو دیا گیا جبکہ لیوی ٹیکس کی مد میں شہریوں سے ٹیکس وصول کرنے کا ظالمانہ نظام قائم ہے۔انہوں نے کہا کہ حکومت اپنی شاہ خرچیاں ختم نہیں کر رہی، وزرا اور مشیروں کے پروٹوکول پر پولیس موبائلز کی بھرمار ہے اور پروٹوکول کے نام پر لاکھوں روپے خرچ کیے جا رہے ہیں۔

(جاری ہے)

امیر جماعت اسلامی کراچی نے کہا کہ شہر میں 42 لاکھ سے زائد موٹرسائیکلیں سڑکوں پر ہیں، جنہیں طلبہ اور مزدور استعمال کرتے ہیں، جاگیردار اور وڈیرے نہیں۔

انہوں نے کہا کہ پیٹرولیم لیوی کے نام پر شہریوں کی جیبوں پر بوجھ ڈالا جا رہا ہے، جس سے ہر طبقہ متاثر ہوا ہے۔انہوں نے مزید کہا کہ شہری ٹیکس ادا کر رہے ہیں لیکن بنیادی سہولتوں سے محروم ہیں۔ کے فور منصوبہ مستقل تعطل کا شکار ہے، نعمت اللہ خان نے 100 ملین گیلن یومیہ پانی کا منصوبہ دیا تھا مگر 23 سال بعد بھی کے فور مکمل نہیں ہوسکا اور شہری مہنگا پانی خریدنے پر مجبور ہیں۔