پاکستان اور ملائیشیا کے درمیان قیدیوں کے تبادلے کے معاہدے پر دستخط

معاہدے پر پاکستان اور ملائیشیا کے وزرائے داخلہ نے دستخط کیے، تقریب میں وزیراعظم، وفاقی وزراء ودیگر کی شرکت

جمعہ 21 اگست 2026 22:20

اسلام آباد(اُردو پوائنٹ اخبارتازہ ترین - این این آئی۔ 21 اگست2026ء) پاکستان اور ملائیشیا کے درمیان سزا یافتہ افراد کی منتقلی کے معاہدے پر دستخط کردئیے گئے۔تفصیلات کے مطابق وزیر اعظم شہبازشریف سے ملائیشیا کے وزیر داخلہ داتو سری سیف الدین نسوتیون اسماعیل نے وزیراعظم ہائوس میں ملاقات کی۔وزیراعظم نے ملائیشیا کے وزیر داخلہ کا خیرمقدم کیااور پاکستان اور ملائیشیا کے درمیان قریبی اور برادرانہ تعلقات کو تمام شعبوں میں مزید مضبوط بنانے کے عزم کا اعادہ کیا۔

انہوں نے بالخصوص سکیورٹی، قانون نافذ کرنے والے اداروں، تجارت اور سرمایہ کاری کے شعبوں میں دوطرفہ تعاون کو مزید فروغ دینے پر زور دیا۔ ملاقات کے دوران علاقائی صورتحال پر بھی گفتگو ہوئی۔ اس موقع پر وزیراعظم نے پاکستان کی علاقائی امن کے لیے جاری کوششوں کی ملائیشیا کی جانب سے حمایت کو سراہا۔

(جاری ہے)

ملائیشیا کے وزیر داخلہ نے وزیراعظم داتو سری انور بن ابراہیم کی جانب سے وزیراعظم محمد شہباز شریف کے لیے نیک تمنائوں کا پیغام پہنچایا اور پاکستان کے ساتھ مضبوط دوطرفہ تعلقات کو مزید مستحکم کرنے میں ملائیشیا کی گہری دلچسپی کا اظہار کیا۔

وزیراعظم محمد شہباز شریف نے دونوں ممالک کے درمیان سزایافتہ افراد کی منتقلی کے معاہدے پر دستخط کی تقریب میں بھی شرکت کی۔ معاہدے پر ملائیشیا کے وزیر داخلہ داتو سری سیف الدین نسوتیون اسماعیل اور وفاقی وزیر داخلہ سید محسن رضا نقوی نے دستخط کیے۔ملاقات کے دوران نائب وزیراعظم و وزیر خارجہ سینیٹر محمد اسحاق ڈار، وزیر مملکت برائے داخلہ طلال چوہدری، وزیراعظم کے معاون خصوصی طارق فاطمی اور دیگر اعلیٰ حکام بھی موجود تھے۔

ملائیشیا کے وزیر داخلہ سیف الدین ناسوتیون بن اسماعیل نے جی ایچ کیو راولپنڈی کا دورہ کیا، فیلڈ مارشل عاصم منیر سے ملاقات کی، پاکستان میں تعینات ملائیشین سفیر اور ایک اعلیٰ سطح وفد بھی ان کے ہمراہ تھا۔ آئی ایس پی آر کے مطابق ملاقات کے دوران علاقائی سکیورٹی کی صورتحال اور باہمی دلچسپی کے امور پر تبادلہ خیال کیا گیا، دونوں فریقین نے پاکستان اور ملائیشیا کے درمیان مضبوط اور دیرینہ تعلقات کو مزید مستحکم کرنے کے عزم کا اعادہ کیا اور مشترکہ دلچسپی کے شعبوں میں تعاون اور روابط کو مزید وسعت دینے کے عزم کا بھی اظہار کیا۔آرمی چیف و چیف آف ڈیفنس فورسز نے ملائیشیا کے ساتھ دفاعی تعاون اور اسٹریٹجک روابط کو مزید مستحکم کرنے کے لئے پاکستان کے عزم کا بھی اعادہ کیا۔