یومِ دفاع ، آرٹس کونسل ڈیرہ غازی خان میں سیمینار و تصویری نمائش

اتوار 6 ستمبر 2026 15:02

ڈیرہ غازی خان (اُردو پوائنٹ اخبارتازہ ترین - اے پی پی۔ 06 ستمبر2026ء) ضلعی انتظامیہ اور پنجاب کونسل آف دی آرٹس ڈیرہ غازی خان کے اشتراک سے یومِ دفاع پاکستان کے موقع پر آرٹس کونسل میں دفاع پاکستان سیمینار اور تصویری نمائش کا انعقاد کیا گیا۔نمائش میں شہدائے وطن اور غازیانِ پاکستان کو خراجِ عقیدت پیش کیا گیا۔اس موقع پر ایڈیشنل ڈپٹی کمشنرز احمد رضا بٹ اور محمد اسد چانڈیہ نے بطور مہمانانِ خصوصی شرکت کی۔

سیمینار میں اسسٹنٹ کمشنر صدر تیمور عثمان، ایڈیشنل اسسٹنٹ کمشنر غلام عباس، ڈپٹی ڈائریکٹر آرٹس کونسل نعیم اللہ طفیل، اسسٹنٹ ڈائریکٹر فضل کریم، پروفیسر محمد صادق قسمانی سمیت سرکاری و نجی تعلیمی اداروں کے سربراہان، اساتذہ، طلبہ، سول سوسائٹی اور شہریوں کی کثیر تعداد موجود تھی ۔

(جاری ہے)

سیمینار میں 6 ستمبر 1965 کی پاک بھارت جنگ کے حوالے سے خصوصی ڈاکومنٹری پیش کی گئی۔

نمائش کے موقع پر بچوں نے ملی نغمے، تقاریر، ٹیبلوز اور خاکے پیش کرکے وطن سے محبت اور قومی جذبے کا اظہار کیا۔ اس موقع پر قومی ترانہ پڑھا گیا جبکہ شرکا نے پاکستان زندہ باد کے فلک شگاف نعرے لگائے۔اس موقع پر ایڈیشنل ڈپٹی کمشنر ہیڈکوارٹر احمد رضا بٹ نے خطاب کرتے ہوئے کہا کہ یومِ دفاع پاکستان ہماری قومی تاریخ کا اہم دن ہے۔ سیمینار کا مقصد نئی نسل کو پاک فوج کے جوانوں کی لازوال قربانیوں، شجاعت اور ملکی دفاع کے لیے انجام دی جانے والی خدمات سے آگاہ کرنا ہے۔

انہوں نے کہا کہ پوری قوم متحد ہے اور پاک فوج کے ساتھ کھڑی ہے۔انہوں نے کہا کہ پاکستان کی سرحدیں محفوظ ہیں، پاک فوج نے ہمیشہ اندرونی و بیرونی سازشوں کا ڈٹ کر مقابلہ کیا ہے اور آئندہ بھی ملک کے دفاع و سلامتی کے لیے ہر چیلنج کا بھرپور مقابلہ کیا جائے گا۔تقریب سے خطاب کرتے ہوئے ڈائریکٹر پنجاب کونسل آف دی آرٹس ڈیرہ غازی خان مقبول احمد رانا نے تقریب میں شرکت کرنے والے مہمانانِ خصوصی، افسران، اساتذہ، طلبہ، سول سوسائٹی اور شہریوں کا شکریہ ادا کیا۔تصویری نمائش میں 1965 کی جنگ سمیت ملکی تاریخ کے اہم واقعات، شہدائے وطن کی قربانیوں اور قومی دفاع کے مختلف پہلوئوں کو اجاگر کیا گیا۔