یوم دفاع لائیو پینٹنگ مقابلہ، رانیہ عباسی پہلی پوزیشن لے اڑیں

کراچی (اُردو پوائنٹ اخبارتازہ ترین - این این آئی۔ 11 ستمبر2026ء) کمشنر کراچی سید حسن نقوی کی خصوصی ہدایت اور سرپرستی میں محکمہ تعلیم کے تعاون سے کراچی کی تاریخ میں پہلی بار کالج کی سطح پر وسیع پیمانے پر یوم دفاع لائیو پینٹنگ مقابلے کا انعقاد کیا گیا، جس کا فائنل اور تقریب تقسیم انعامات آرٹس کونسل کراچی میں منعقد ہوئی۔مقابلے میں پی ای سی ایچ ایس کالج فار ویمن کی طالبہ رانیہ عباسی نے پہلی، گورنمنٹ ڈگری کالج نارتھ کراچی کی فاطمہ نے دوسری جبکہ ایس ایم بی بی کالج اعظم بستی کی زینب خان نے تیسری پوزیشن حاصل کی۔

کمشنر کراچی سید حسن نقوی نے تقریب میں پوزیشن حاصل کرنے والے طلبہ میں انعامات تقسیم کیے۔ تقریب میں بڑی تعداد میں طلبہ اور اساتذہ نے شرکت کی۔کمشنر کراچی سید حسن نقوی نے تقریب سے خطاب کرتے ہوئے کہا کہ پینٹنگ مقابلے کے انعقاد کا مقصد دفاع پاکستان کے شہدا کو خراج عقیدت پیش کرنا ہے۔

(جاری ہے)

موجودہ عالمی اور جغرافیائی سیاسی حالات میں یوم دفاع کی اہمیت مزید بڑھ گئی ہے۔

گزشتہ ایک سال کے دوران پاکستان نے جس انداز میں اپنا دفاع کیا، اس سے ثابت ہوتا ہے کہ پوری قوم متحد اور ہر خطرے سے نمٹنے کے لیے تیار ہے۔انہوں نے پاک فوج کے کردار کو سراہتے ہوئے کہا کہ ہماری فوج نے عالمی سطح پر پاکستان کا سر بلند کیا ہے۔ نوجوانوں اور اساتذہ کو چاہیے کہ وہ آرٹ کے ساتھ ساتھ سائنس، انفارمیشن ٹیکنالوجی اور جدت کے شعبوں میں بھی اپنی صلاحیتوں کو بروئے کار لائیں تاکہ پاکستان دنیا میں بہترین کارکردگی دکھانے والی قوموں میں شامل ہوسکے۔

سید حسن نقوی نے بتایا کہ کراچی کے تمام اضلاع سے 128 کالجز نے مقابلے میں حصہ لیا، جس کے بعد ضلعی سطح پر سیمی فائنلز منعقد ہوئے اور فائنل راؤنڈ میں 50 منتخب طلبہ نے اپنی فنکارانہ صلاحیتوں کا مظاہرہ کیا۔انہوں نے اعلان کیا کہ لائیو پینٹنگ مقابلوں کا سلسلہ صرف سالانہ تقریب تک محدود نہیں رہے گا بلکہ 25 دسمبر کے موقع پر آرٹس کونسل کے تعاون سے ایک اور بڑا پروگرام منعقد کیا جائے گا۔

آئندہ اس مقابلے کا دائرہ اسکول کی سطح تک بھی بڑھایا جائے گا تاکہ زیادہ سے زیادہ طلبہ کو اپنی صلاحیتوں کے اظہار کا موقع مل سکے۔کمشنر کراچی نے مقابلے کے انعقاد میں تعاون پر محکمہ تعلیم، کالجز کے پرنسپلز اور اساتذہ کا شکریہ ادا کیا جبکہ آرٹس کونسل کے صدر احمد شاہ سے بھی خصوصی اظہار تشکر کیا اور کہا کہ آرٹس کونسل کے ساتھ تعاون کا دائرہ مزید وسیع کیا جائے گا۔

تقریب سے خطاب کرتے ہوئے آرٹس کونسل کے صدر احمد شاہ نے کمشنر کراچی سید حسن نقوی کی کاوش کو سراہتے ہوئے اعلان کیا کہ کمشنر کراچی کی درخواست پر مقابلے میں شارٹ لسٹ ہونے والے تمام طلبہ کو آرٹس کونسل کی جانب سے مفت فنونِ لطیفہ کی تربیت فراہم کی جائے گی۔احمد شاہ نے کہا کہ آرٹس کونسل اور کمشنر کراچی آفس کے درمیان یہ شراکت داری مستقل بنیادوں پر جاری رہے گی۔ تقریب سے ریجنل ڈائریکٹر کالجز گلاب رائے اور ڈائریکٹر اسپورٹس کمشنر آفس غلام محمد خان نے بھی خطاب کیا۔