بلاول بھٹو زرداری اتحاد ٹاﺅن سے خیبر چوک تک سڑکوں کا دورہ کریں. ملک سربلند خان

پیپلزپارٹی نے بلدیہ ٹاﺅن کو کھنڈر بنا دیا، عوام بنیادی سہولیات سے محروم ہیں، پیپلز پارٹی نے پہلے بلدیہ کے عوام کا مینڈیٹ چھینا، اب بنیادی سہولیات سے بھی محروم کر دیا. تحریک انصاف کراچی کے راہنما کا بیان

میاں محمد ندیم جمعہ 9 اکتوبر 2026 16:34

بلاول بھٹو زرداری اتحاد ٹاﺅن سے خیبر چوک تک سڑکوں کا دورہ کریں. ملک ..

کراچی(اردوپوائنٹ اخبارتازہ ترین-انٹرنیشنل پریس ایجنسی۔09 اکتوبر ۔2026 ) پاکستان تحریک انصاف کے حلقہ PS-112 بلدیہ ٹاﺅن کے سابق رکن سندھ اسمبلی ملک سربلند خان نے چیئرمین پاکستان پیپلز پارٹی بلاول بھٹو زرداری کے دور ہ بلدیہ کے حوالے سے اپنے ردعمل میں مطالبہ کیا ہے کہ وہ مخصوص مقام تک محدود رہنے کے بجائے اتحاد ٹاﺅن سے خیبر چوک تک سڑکوں کا دورہ کرتے اور علاقے کے عوام کو درپیش مشکلات کا خود مشاہدہ کریں.

(جاری ہے)

ملک سربلند خان نے کہا کہ بلدیہ ٹاﺅن کی خستہ حال سڑکیں، جگہ جگہ گڑھے اور بنیادی شہری سہولیات کا فقدان پیپلز پارٹی کی حکومتی کارکردگی پر سوالیہ نشان ہیں علاقے کے شہری روزمرہ آمدورفت میں شدید مشکلات کا سامنا کر رہے ہیں، لیکن ان کے دیرینہ مسائل حل کرنے کے لیے موثر اقدامات نظر نہیں آتے. انہوں نے کہا کہ پیپلز پارٹی نے بلدیہ ٹاﺅن کو کھنڈر بنا دیا ہے عوام یہ پوچھنے میں حق بجانب ہیں کہ علاقے کے لیے مختص ترقیاتی فنڈز کہاں خرچ ہوئے اور شہریوں کو معیاری سڑکیں، نکاسی آب اور دیگر بنیادی سہولیات کیوں فراہم نہیں کی گئیں بلدیہ ٹاﺅن میں چیئرمین بھی پیپلزپارٹی کا ہے لیکن گٹروں کے ڈھکن تک نہیں لگائے جاتے انہوں نے مطالبہ کیا کہ ترقیاتی منصوبوں اور فنڈز کے استعمال کی تفصیلات عوام کے سامنے لائی جائیں.

ملک سربلند خان نے کہا کہ پیپلز پارٹی نے پہلے بلدیہ کے عوام کے مینڈیٹ کو چھینا اور اب شہری بنیادی سہولیات کے لیے بھی پریشان ہیں کراچی میں گزشتہ 18 سال سے پیپلز پارٹی کی حکمرانی کے باوجود شہری مسائل برقرار ہیں عوام کو سیاسی نعروں اور نمائشی دوروں کے بجائے عملی ترقیاتی کام اور جواب دہی درکار ہے. انہوں نے کہا کہ اگر کسی اہم سیاسی شخصیت کے دورے پر سڑکوں کی تعمیر و مرمت کا کام شروع ہو سکتا ہے تو عام دنوں میں عوام کو یہ سہولت کیوں فراہم نہیں کی جاتی؟ حکومت اور متعلقہ اداروں کو چاہیے کہ وہ عوامی مسائل کے حل کو ترجیح دیں اور بلدیہ کے شہریوں کو مزید نظرانداز کرنا بند کریں.

سابق رکن سندھ اسمبلی نے مطالبہ کیا کہ اتحاد ٹاﺅن سے خیبر چوک تک تباہ حال سڑکوں کی فوری تعمیر و مرمت یقینی بنائی جائے، ترقیاتی فنڈز کے استعمال کا شفاف حساب پیش کیا جائے اور بلدیہ ٹاﺅن کے عوام کو بنیادی شہری سہولیات فراہم کی جائیں.