سپریم کورٹ کے جج جسٹس قاضی فائز عیسیٰ نے بینچ سے علیحدہ کرنے کے طریقہ کار پر تحفظات کا اظہارکردیا

سپریم کورٹ کے اصل دائرہ کار کے استعمال سے پہلے اس کا آئین سے مطابقت دیکھنا ضروری ہے، آرٹیکل 184) ) تھری پڑھے جانے سے پہلے چیف جسٹس نے مداخلت کی اور کہاکہ وہ بنچ دوبارہ تشکیل دے رہے ہیں، بینچ کی تشکیل نو بلاجوازہے، اس حوالے سے کوئی آرڈر مجھے نہیں دیا گیا ،اس سے نظام انصاف کی شفافیت کو نقصان پہنچا ہے جس کے سنگین نتائج مرتب ہوسکتے ہیں ،اختلافی نوٹ نہ لکھتا توضمیر پر بوجھ برداشت کرنا پڑتا، مجھے جج کی ذمہ داریاں ادا کرنے سے روکا جارہا ہے جسٹس قاضی فائز عیسی ٰ کا ادویات کے فضلے کو تلف کیے جانے کے ازخود نوٹس کیس کی سماعت کرنے والے بنچ سے علیحدہ کئے جانے کے معاملے پر اختلافی نوٹ سامنے آگیا

ہفتہ 12 مئی 2018 23:22

اسلام آباد (اُردو پوائنٹ اخبار آن لائن۔ ہفتہ 12 مئی 2018ء) سپریم کورٹ کے جج جسٹس قاضی فائز عیسیٰ نے چیف جسٹس آف پاکستان جسٹس ثاقب نثار کی جانب سے آئین کے آرٹیکل 184) )3کے کیس کی سماعت کے دوران بینچ سے علیحدہ کرنے کے طریقہ کار پر تحفظات ظاہر کرتے ہوئے کہاہے کہ آرٹیکل 184) ) تھری پڑھے جانے سے پہلے چیف جسٹس نے مداخلت کی اور کہاکہ وہ بنچ دوبارہ تشکیل دے رہے ہیں اور پھر وہ اٹھ گئے ، بنچ دوبارہ تشکیل دیدیا گیا اور اس سے متعلق مجھے کوئی بھی آرڈر نہیں بھیجا گیا تھا ، بینچ کی تشکیل نو بلاجواز اور بے مثال ہے کیوں کہ اس حوالے سے کوئی آرڈر مجھے نہیں دیا گیا اور ایسا کرنے سے نظام انصاف کی شفافیت کو نقصان پہنچا ہے جس کے سنگین نتائج مرتب ہوسکتے ہیں، سپریم کورٹ کے اصل دائرہ کار کے استعمال سے پہلے اس کا آئین سے مطابقت دیکھنا ضروری ہے ،یہ نوٹ لکھنے پر مجبور ہو ں ،اگر وہ ایسا نہ کرتے تو اپنے ضمیر پر بوجھ برداشت کرنا پڑتا، مجھے جج کی ذمہ داریاں ادا کرنے سے روکا جارہا ہے۔

(جاری ہے)

تفصیلات کے مطابق چیف جسٹس آف پاکستان جسٹس میاں ثاقب نثار کی جانب سے سپریم کورٹ پشاور رجسٹری میں ادویات کے فضلے کو تلف کیے جانے کے حوالے سے ازخود نوٹس کیس کی سماعت کرنے والے بینچ سے الگ کرنے کے طریقہ کار پر سپریم کورٹ کے جج جسٹس قاضی فائز عیسیٰ نے تحفظات کا اظہار کردیا۔ 8 مئی کو سپریم کورٹ پشاور رجسٹری میں ادویات کے فضلے کو تلف کیے جانے کے حوالے سے ازخود نوٹس کیس کی سماعت تھی اور چیف جسٹس ثاقب نثار، جسٹس قاضی فائز عیسیٰ اور جسٹس منصور علی شاہ پر مشتمل تین رکنی بینچ اس کی سماعت کررہا تھا۔

چیف جسٹس کی سربراہی میں سپریم کورٹ پشاور رجسٹری میں اسپتالوں کے فضلے سے متعلق کیس کی سماعت شروع ہوتے ہی جسٹس فائزعیسیٰ نے چیف جسٹس پر اعتراض اٹھادیاتھا اور کہا تھا کہ آپ ہیومن رائٹس سے متعلق امور کی سماعت نہیں کرسکتے، چیف جسٹس آرٹیکل ایک سو چوراسی کے تحت انسانی حقوق سے متعلق امور کی سماعت نہیں کرسکتے، اس سماعت کے حوالے سے اب جسٹس قاضی فائز عیسیٰ کا ایک نوٹ سامنے آیا ہے جس میں انہوں نے لکھا ہے کہ سماعت کے دوران صوبے کے ایڈووکیٹ جنرل سے یہ سوال کیا گیا کہ یہ معاملہ کس طرح آرٹیکل 184 تھری کے اندر آتا ہے آپ 184 تھری پڑھیں۔

جسٹس قاضی فائر عیسیٰ کے نوٹ کے مطابق ابھی ایڈووکیٹ جنرل 184 تھری پڑھ ہی رہے تھے کہ اس دوران چیف جسٹس آف پاکستان نے مداخلت کی اور کہا کہ ہم یہ بینچ دوبارہ تشکیل دیں گے۔جسٹس قاضی فائز عیسیٰ نے اپنے نوٹ میں مزید لکھا کہ 184 تھری کو پڑھے جانے سے پہلے چیف جسٹس نے مداخلت کی اور کہا کہ وہ بینچ کو دوبارہ تشکیل دے رہے ہیں جس کے بعد بینچ اٹھ گیا۔

جسٹس قاضی فائز عیسیٰ کے نوٹ کے مطابق بینچ دوبارہ تشکیل دیا گیا تاہم اس حوالے سے مجھے کوئی نوٹس نہیں بھجوایا گیا، جس کے بعد دو رکنی بینچ اکھٹا ہوا اور اس بینچ میں مجھے شامل نہیں کیا گیا اور مجھے نکال دیا گیا۔جسٹس قاضی فائز عیسیٰ نے اپنے نوٹ میں لکھا ہے کہ بینچ کی تشکیل نو بلاجواز اور بے مثال ہے کیوں کہ اس حوالے سے کوئی آرڈز مجھے نہیں دیا گیا اور ایسا کرنے سے نظام انصاف کی شفافیت کو نقصان پہنچا ہے جس کے سنگین نتائج مرتب ہوسکتے ہیں۔

جسٹس قاضی فائز عیسی ٰنے اپنے نوٹ میں مزید لکھا کہ سپریم کورٹ کے اصل دائرہ کار کے استعمال سے پہلے اس کا آئین سے مطابقت دیکھنا ضروری ہے۔جسٹس قاضی فائز عیسیٰ نے کہا کہ وہ یہ نوٹ لکھنے پر مجبور ہوئے ہیں اور اگر وہ ایسا نہ کرتے تو اپنے ضمیر پر بوجھ برداشت کرنا پڑتا۔آخر میں جسٹس قاضی فائز عیسیٰ نے اپنے نوٹ میں یہ بھی لکھا کہ مجھے جج کی ذمہ داریاں ادا کرنے سے روکا جارہا ہے۔