بریسٹ کینسر پرقابو پانے کے لئے اس بیماری پر توجہ مرکوز کرنے کی ضرورت ہے

کراچی۔ (اُردو پوائنٹ اخبارتازہ ترین - اے پی پی۔ 13 اکتوبر2018ء) صدرمملکت ڈاکٹر عارف علوی نے کہا ہے کہ بریسٹ کینسر پرقابو پانے کے لئے اس بیماری پر توجہ مرکوز کرنے کی ضرورت ہے، بروقت تشخیص نہ ہونے کی ایک وجہ بیماری کے حوالے سے عدم آگاہی بھی ہے، علاج کے ساتھ احتیاط کی بھی ضرورت ہے، الیکٹرانک میڈیا کو مفاد عامہ کے پیغامات چلانے چاہیئے، لیڈی ہیلتھ وزیٹر اہم کردار ادا کررہی ہے۔

ان خیالات کا اظہار انہوں نے ہفتہ کو گورنرہاوس میں بریسٹ کینسر کے حوالے سے منعقدہ آگاہی پروگرام کے دوران گفتگو کرتے ہوئے کیا۔ اس موقع پر صوبائی وزیر صحت ڈاکٹرعذراپیچوہو، مختلف جماعتوں سے تعلق رکھنے والی اراکین اسمبلی، ڈاکٹرز اور سول سوسائٹی سے تعلق رکھنے والی خواتین نے شرکت کی۔

(جاری ہے)

صدرمملکت ڈاکٹر عارف علوی نے کہا کہ ماضی میں بریسٹ کینسر کی بیماری پر اتنی توجہ نہیں دی گئی جتنی توجہ دینی چاہئے تھی۔

انہوں نے کہا کہ ہمارے ہاں علاج پر توجہ مرکوز رہتی ہے اور علاج کے لئے مطلوب سہولیات پر بھی بات ہوتی ہے لیکن علاج کے ساتھ احتیاط بھی ضروری ہے، احتیاطی تدابیر اپنانے سے بہت ساری بیماریوں سے بچا جاسکتا ہے۔ صدرمملکت نے کہا کہ بریسٹ کینسر کی بروقت تشخص نہ ہونے کی ایک وجہ بیماری کے حوالے سے عدم آگاہی بھی ہے۔ انہوں نے کہا کہ آگاہی کے حوالے سے الیکٹرانک میڈیا اہم کردار اداکرسکتی ہے اور الیکٹرانک میڈیا کو مفاد عامہ کے پیغامات چلانے چاہئے۔

صدرمملکت نے اپنے اس عزم کو دہراتے ہوئے کہا کہ معاشرے کے ایسے مسائل اٹھاؤنگا جس کا تعلق سیاست سے نہ ہوں۔ صدرمملکت نے کہا کہ ملک میں لیڈی ہیلتھ وزیٹر اہم کرادار ادا کررہی ہے ان کو اور زیادہ باصلاحیت بنانے کی ضرورت ہے۔ ڈاکٹر عارف علوی نے کہا کہ ملک کی بڑھتی ہوئی آبادی بھی ایک مسئلہ ہے لیکن اس مسئلہ پر ماضی میں توجہ نہیں دی گئی ہے اس مسئلہ کو قومی بحث کا حصہ بنانا چاہئے۔

انہوں نے کہا کہ اس حوالے سے لڑکیوں کی تعلیم پر توجہ دینے کی ضرورت ہے۔ صدرمملکت نے کہا کہ ہمیں زندگی کے ہرشعبہ کو بہتر بنانے کے لئے کام کرنے چاہئے اور ایسے اہداف مقرر کرنے چاہئے جن کا حصول ممکن ہوں۔ انہوں نے کہا کہ اسلام میں خواتین کے وارثت کے حوالے سے واضح احکامات موجود ہیں، ہمارے ہاں خواتین کے وارثت میں مسائل درپیش ہیں۔ انہوںنے کہا ان مسائل کا حل ضروری ہے۔

انہوں نے کہا کہ خواتین کو معاشرے کے جن جن شعبوں میں مسائل اور مشکلات کا سامناہے ان مشکلات اور مسائل کو ختم کرنا ضروری ہے۔ ڈاکٹر عارف علوی نے کہا کہ مسائل کے حل کے لئے حکومتی تعاون لازمی ہے۔ اس موقع پر گفتگو کرتے ہوئے وزیر صحت سندھ ڈاکٹرعذرا پیچوہو نے گفتگو کرتے ہوئے صحت کے شعبہ میں اٹھائے جانے والے اقدامات سے صدرمملکت کو آگاہ کیا۔

انہوں نے کہا کہ بریسٹ کینسر خواتین کا ایک بڑا مسئلہ ہے اور پاکستان میں بریسٹ کینسر کی مریضوں میں اضافہ ہورہاہے اور ہر سال تقریباً40 ہزار خواتین اس مرض سے انتقال کرجاتی ہے۔ اس موقع پر پرگروام کے شرکاء نے گفتگو کرتے ہوئے کہا کہ اسکولوں کی سطح پر بریسٹ کینسر کے متعلق آگاہی شروع کردینی چاہئے۔ صوبائی وزیرصحت اور پروگرام کے دیگر شرکاء نے بریسٹ کینسر کے حوالے سے گورنرہاؤس سندھ میں پروگرام کے انعقاد پر صدرمملکت ڈاکٹرعارف علوی کا شکریہ بھی ادا کیا۔