علامہ اقبال اوپن یونیورسٹی میں اساتذہ کیلئے سہ روزہ تربیتی پروگرام کا آغاز ہوگیا

اسلام آباد(اُردو پوائنٹ اخبارتازہ ترین - آن لائن۔ 16 اپریل2024ء) علامہ اقبال اوپن یونیورسٹی میں اساتذہ کیلئے سہ روزہ تربیتی پروگرام کا آغاز ہوگیا۔ اس پروگرام کا انعقاد ڈائریکٹوریٹ آف اکیڈیمک پلاننگ اینڈ کورس پروڈکشن ،اوپن یونیورسٹی اور کامن ویلتھ ایجوکیشنل میڈیا سنٹر فار ایشیا کے باہمی اشتراک سے کیا گیا ہے۔ اس کا مقصداساتذہ کو آرٹیفیشل انٹیلیجنس ٹولز اور ٹیکنالوجیز سے آشنائی اور تدریسی طریقوں میں مؤثر طریقے سے استعمال کے حوالے سے آگاہی دینا ہے۔

افتتاحی اجلاس کی صدارت ڈین فیکلٹی آف ایجوکیشن، پروفیسر ڈاکٹر فضل الرحمان نے کی، جبکہ ڈائریکٹر، کامن ویلتھ ایجوکیشنل میڈیا سنٹر فار ایشیا، ڈاکٹر بشیر نے بطور مہمان خصوصی آن لائن شرکت کی۔ڈاکٹر بشیر نے شرکاء سے خطاب کرتے ہوئے کہا کہ مصنوعی ذہانت کا جہاں منفی استعمال ہے وہیں اس کے بے جا مثبت اور کارآمد فوائد بھی ہیں۔

(جاری ہے)

پڑھانے ، سیکھنے اور سکھانے کے عمل میں اگر اس ٹیکنالوجی کا صحیح استعمال کیا جائے توقلیل وقت میں بہت سا کام مکمل کیا جا سکتا ہے۔

تعلیم کے شعبے میں مصنوعی ذہانت کا استعمال اور کردادر اب ناگزیر ہو چکا ہے۔ ڈاکٹر فضل الرحمن نے اپنے خطاب میں کہا کہ مصنوعی ذہانت کو تدریسی عمل میں شامل کرنے کی یہ تربیتی ورکشاپ اساتذہ کی صلاحیتوں میں اضافے کا باعث بنے گی،ٹیچنگ اور لرننگ کے عمل کو تقویت ملے گی۔انہوں نے ورکشاپ کے انعقاد پر آرگنائزیننگ کمیٹی کو مبارکباد پیش کرتے ہوئے کہا کہ یونیورسٹی کے وائس چانسلر، پروفیسر ڈاکٹر ناصر محمود فیکلٹی ڈیولپمنٹ پر خصوصی توجہ دے رہے ہیں۔

یہ تربیتی ورکشاپ تین دن جاری رہے گی جس میں غیر ملکی و ملکی ماہرین مختلف موضوعات پر آگاہی دیں گے اور سوال و جواب کی نشست کریں گے۔ تقریب کے آغاز پر ڈائریکٹر اکیڈیمک پلاننگ اینڈ کورس پروڈکشن، ڈاکٹر زاہد مجید نے ورکشاپ کے اغراض و مقاصد بیان کیے۔