بھارتی آرمی چیف کو سیاسی آلہ کے طورپر بیان بازی سے پرہیز کر نا چاہیے ،ْ وزیر اطلاعات چوہدری فواد

اسلام آباد(اُردو پوائنٹ اخبارتازہ ترین - این این آئی۔ 22 ستمبر2018ء) وزیراطلاعات و نشریات چوہدری فواد حسین نے بھارتی آرمی چیف کا دھمکی آمیز بیان پر رد عمل کا اظہار کرتے ہوئے کہا ہے کہ دنیا دیکھ رہی ہے کہ کون امن اور کون جنگ چاہتا ہے ہم نے امن کیلئے پہلے ہاتھ آگے بڑھایا تھا ،اب بھی امن کیلئے کوششیں جاری رکھیں گے ،ْ بھارتی آرمی چیف کو سیاسی آلہ کے طورپر بیان بازی سے پرہیز کر نا چاہیے ۔

ایک انٹرویو میں وزیر اطلاعات نے کہا کہ پاکستان اور بھارت دونوں ایٹمی طاقتیں ہیں ،ْجنگ نہیں ہو سکتی ۔انہوںنے کہا کہ پاکستان اور بھارت میں مسائل کا واحد حل مذاکرات ہیں ۔ وزیر اطلات نے کہا کہ دونوں ممالک کے درمیان امن کروڑوں عوام کے فائدے میں ہے ۔ وزیر اطلاعات نے کہا کہ دنیا دیکھ رہی ہے کہ کون امن اور کون جنگ چاہتا ہے انہوں نے کہا کہ ہم نے پہلے امن کیلئے ہاتھ آگے بڑھایا تھا ہم اب بھی امن کیلئے کوششیں جاری رکھیں گے ۔

(جاری ہے)

وزیراطلاعات نے کہا کہ پر امن ملک کی حیثیت سے پاکستان امن کا خواہاں ہے ۔انہوںنے کہاکہ بھارتی آرمی چیف کا بیان نامناسب ہے ،ْبھارتی آرمی چیف کو سمجھنا چاہئے کہ وہ بھارتیا جنتا پارٹی کے سربراہ نہیں ۔ انہوں نے کہا کہ بھارتی آرمی چیف کو سیاسی آلہ کار کے طور پر بیان بازی سے پرہیز کر نا چاہیے ۔ وزیر اطلاعات نے کہا کہ بھارت اپنے اندرونی خلفشار اور داخلی دباؤ کے باعث اس طرح کی حرکتیں کر رہا ہے۔

چوہدری فواد حسین نے کہا کہ بھارتی حکمران طبقے کی جنگی جنون پیدا کرنے کی کوششوں کو مسترد کرتے ہیں۔انہوںنے کہاکہ بھارتی حکومت پاکستان کے خلاف نفرت پھیلا کر بھارتی عوام کی وزیراعظم مودی کے کرپشن اسکینڈل سے توجہ ہٹانا چاہتی ہے۔وزیر اطلاعات نے کہا کہ دنیا جانتی ہیں کہ رافیل ڈیل بے نقاب ہونے کے بعد بھارتی وزیراعظم سے مستعفی ہونے کا مطالبہ کیا جا رہا ہے۔

وزیر اطلاعات و نشریات چوہدری فواد حسین نے کہاکہ امن کے لیے پاکستان اور بھارت کے رویوں میں فرق ساری دنیا نے دیکھ لیا ،ْوزیر اعظم پاکستان عمران خان امن جبکہ بھارت دھمکی کی زبان استعمال کر رہا ہے۔انہوںنے کہا کہ ہم نے امن کے لیے ہاتھ آگے بڑھایا تھا،امن دونوں ممالک کے عوام کی بہتری اور خطے کی خوشحالی کیلئے ضروری ہے۔ذمہ دار ملک کی حیثیت سے پاکستان امن کا خواہاں ہے۔