سونا 100000ہزارروپے تولہ اور ڈالر 180روپے تک جا ئے گا، ایاز میمن موتی والا

کراچی (اُردو پوائنٹ اخبارتازہ ترین - این این آئی۔ 19 اگست2019ء) کراچی تاجرالائنس ایسوسی ایشن کے چیئرمین وبانی عام آدمی پاکستان ایاز میمن موتی والا نے کہا ہے کہ ملک میں مہنگائی کے تمام حدیں پار ہوچکی ہیں اور اشیائے خوردونوش کی قیمتیں آسمان سے باتیں کررہی ہیں ، عمران خان کی ایک سالہ حکومت نے قرضوں کا ریکارڈ قائم کردیا ہے، ، قرضوں کے اوپر سود کی رقم کی ادائیگی کے لیئے مہنگائی بڑھائی جارہی ہے،موجودہ حکومت نے عوام کو مایوسیوں کے سوا کچھ نہیں دیا، بین الاقوامی مارکیٹ میں پٹرولیم مصنوعات کی قیمتوں میں کمی کے باوجود ہمارے ملک میں پٹرولیم مصنوعات کے نرخ کم نہیں کیے جاتے، اگر یہی حالات رہے تو وہ دن دور نہیں جب سونا 100000روپے تولہ اور ڈالر 180روپے پر پہنچ جائے گا، اسٹاک ایکسچینج تباہی کے دہانے پر ہے جبکہ معیشت کی ڈوبتی ہوئی نائو پر توجہ نہیں دی جارہی ہے، ان خیالات کا اظہارا نہوں نے ڈیفنس آفس میں تاجروں کے وفد سے ملاقات کے دوران کیا، ایاز میمن کا کہنا تھا کہ پاکستان میں اس وقت ہر شعبے کی مافیا نے حکومت کے ساتھ گٹھ جوڑ کیا ہوا ہے ، پٹرول مافیا کو فائدہ پہنچانے کے لیے ٹریفک کے نظام کو درہم برہم کیا ہوا ہے تاکہ ٹریفک جام میں پٹرول کا ضیاع ہو ، شہر میں موجود گندگی کے ڈھیر ختم نہیں کیے جاتے تا کہ وبائی امراض پھیلیں ، لوگ بیمار ہوں اور ادویاساز کمپنیوں کے دوائیاں بکیں ، موجودہ حکومت نے عوام کے مسائل سے آنکھیں بند کی ہوئی ہیں، انہوں نے کہا کہ مسائل میں گھری معاشی صورتحال کو اپنے پیروں پر کھڑا کرنے اور ڈالر کو 100روپے پر لانے کا فارمولا میرے پاس ہے اور اپنے ملک کی بہتری کے لیئے میں بغیر کسی معاوضے کے معاشی حالات میں بہتری لانے کے لیئے اپنی خدمات حکومت کو فراہم کر سکتا ہوں ، انہوں نے کہا کہ موجودہ حکومت تاریخ کی واحد حکومت ہے جس میں میڈیا مکمل آزاد نہیں ہے ، حکومتی خوف سے میڈیا سچائی نہیں دکھا سکتا ، سچ بولنے والے کو گھر سے اٹھالیاجاتا ہے، انہوں نے کہا کہ اس وقت پاکستان میں شدید نفسا نفسی کا عالم ہے، مہنگائی اور بیروزگاری کی ستائی عوام کی زندگی میں مسائل روزانہ کی بنیادوں پر بڑھ رہے ہیں ۔