پاکستان کوسٹ گارڈز اور پولیس کی مشترکہ کارروائی، کروڑوں روپے مالیت کی چرس برآمد

منشیات سمندر کے راستے بیرون ملک اسمگل ہونا تھی، پکڑی جانے والی منشیات کی مالیت کروڑوں روپے کے لگ بھگ ہے، ترجمان

اتوار 7 مارچ 2021 13:10

کراچی(اُردو پوائنٹ اخبارتازہ ترین - این این آئی۔ 07 مارچ2021ء) پاکستان کوسٹ گارڈز نے متعلقہ اداروں کے ساتھ بلوچستان کی ساحلی علاقوں میں کارروائیوں کے دوران منشیات کے 4 اسمگلرز کو گرفتار کر کے بھاری مقدار میں منشیات برآمد کرلی۔ترجمان کے مطابق منشیات کے خلاف سخت چیکنگ کے دوران پاکستان کوسٹ گارڈز اورگوادر پولیس نے مشترکہ کاروائی کرتے ہوئے گوادر کے علاقے سٹی ہوڑہ میں بیش قیمت منشیات بیرون ملک اسمگل ہونے کی کوشش کو ناکام بنا دیا۔

(جاری ہے)

پاکستان کوسٹ گارڈز اور گوادر پولیس نے مختلف علاقوں میں جوائنٹ ٹیمیں تشکیل دیں، آپریشن متعلقہ علاقے سے سمندر کے کنارے لوڈنگ کے دوران 1100 کلو گرام اعلی کوالٹی کی چرس، ایک ہائی لیکس سنگل کیبن، ایک اسپیڈ بوٹ اور 4 ملزمان کو بھی گرفتار کر لیا گیا۔ترجمان کوسٹ گارڈ کے مطابق شبہ ہے کہ یہ منشیات سمندر کے راستے بیرون ملک اسمگل ہونا تھی، پکڑی جانے والی منشیات کی مالیت کروڑوں روپے کے لگ بھگ ہے۔ڈائریکٹر جنرل پاکستان کوسٹ گارڈز نے جوانوں کی اس انتھک محنت اور اعلیٰ کارکردگی کو سراہا۔