سندھ میں مون سون کی غیر معمولی بارشیں ہوئی ہیں، شرجیل انعام میمن

کراچی (اُردو پوائنٹ اخبارتازہ ترین - این این آئی۔ 19 اگست2022ء) وزیر اطلاعات سندھ شرجیل انعام میمن نے کہا ہے کہ سندھ میں مون سون کی غیر معمولی بارشیں ہوئی ہیں ۔ جس سے شہروں کے انفراسٹرکچر اور دیہی علاقوں میں فصلوں کو شدید نقصان ہوا ہے ۔ اپنے جاری بیان میں انہوں نے کہا کہ مون سون کے حالیہ اسپیل سے حیدرآباد ، جامشورو ، دادو ، ملیر ، عمرکوٹ ، مٹیاری ، ٹنڈو محمد خان، بدین ، ٹھٹہ اور سجاول زیادہ متاثر ہوئے ہیں ۔

سندھ حکومت کی جانب سے امدادی کارروائیاں جاری ہیں ۔تمام متاثرہ اضلاع میں سندھ کابینہ کے اراکین امدادی کارروائیوں کی نگرانی کر رہے ہیں ، جبکہ پی ڈی ایم اے متاثرہ علاقوں میں ٹینٹ اور راشن سمیت نکاسی آب کے لیے مشینری پہنچا رہی ہے ۔ انہوں نے کہا ہے کہ وزیر اعلی سندھ کی ہدایت پر سندھ حکومت نے تمام متاثرہ اضلاع کے ڈپٹی کمشنرز کو امدادی کارروائیوں کے لیے 30 ، 30 لاکھ روپے فوری جاری کر دیئے ہیں اور ضلعی انتظامیہ کو ہدایات جاری کر دی گئی ہیں کہ متاثرہ خاندانوں کو اسکولوں میں متبادل رہائش فراہم کی جائے ۔

(جاری ہے)

انہوں نے کہا کہ سندھ حکومت بارشوں کے باعث ہونے والے جانی و مالی نقصان کا ازالہ کرے گی ۔ وزیر اعلی سندھ نے تمام ڈویژنل کمشنرز سے نقصان کا ڈیٹا طلب کر لیا ہے ۔ انہوں نے کہا کہ وزیر اعلی سندھ نے محکمہ صحت اور محکمہ بلدیات کو گیسٹرو ، ملیریا اور ڈینگی کے پھیلا کو روکنے کے لیے ضروری اقدامات کی بھی ہدایات جاری کر دی ہیں ۔ شرجیل انعام میمن متاثرہ خاندانوں کو بے نظیر انکم سپورٹ پروگرام کے تحت بھی مالی مدد فراہم کی جائے گی ۔