عطا تارڑ کی این اے 127 لاہور سے کامیابی کا نوٹی فکیشن چیلنج

لاہور(اُردو پوائنٹ اخبارتازہ ترین - آن لائن۔ 28 مارچ2024ء) پاکستان مسلم لیگ ن کے رہنما وفاقی وزیر برائے اطلاعات و نشریات عطا اللہ تارڑ کی این اے 127 لاہور سے کامیابی کا نوٹی فکیشن چیلنج کردیا گیا۔ تفصیلات کے مطابق ن لیگی رہنما عطا تارڑ کی این اے 127 لاہور سے کامیابی کا نوٹی فکیشن لاہور ہائیکورٹ میں چیلنج کیا گیا ہے، اسی طرح لاہور ہی سے پجاب اسمبلی کے حلقہ پی پی 145 سے مسلم لیگ ن کے ایم پی اے سمیع اللہ کی کامیابی کے نوٹی فکیشن کو بھی لاہور ہائیکورٹ میں چیلنج کردیا گیا ہے۔

بتایا گیا ہے کہ انتخابی عذرداریوں میں الیکشن کمیشن سمیت دیگر کو فریق بنایا گیا ہے، الیکشن ٹریبونل کے جج جسٹس سلطان تنویر دونوں درخواستوں پر سماعت کریں گے جہاں عطا تارڑ کی کامیابی کا نوٹیفکیشن پاکستان تحریک انصاف کی حمایت سے سنی اتحاد کونسل امیدوار ظہیر عباس کھوکھر کی جانب سے چیلینج کیا گیا ہے اور پی پی 145 لاہور کے نوٹی فکیشن کو محمد یاسر کی جانب سے چیلینج کیا گیا۔

(جاری ہے)

دوسری طرف الیکشن کمیشن آف پاکستان نے ملتان سے قومی اسمبلی کے حلقہ این اے 148 میں ووٹوں کی دوبارہ گنتی کی درخواست خارج کردی، اس حوالے سے بیرسٹر تیمور الطاف اور ملک احمد حسین ڈیہڑ نے درخواستیں دائر کی تھیں، جن پر ممبر سندھ کی سربراہی میں 3 رکنی کمیشن نے فیصلہ دیا اور این اے 148 سے سید یوسف رضا گیلانی کی کامیابی برقرار رکھا۔ الیکشن کمیشن نے اس سلسلے میں تحریری فیصلہ جاری کر دیا، جس میں الیکشن کمیشن کی طرف سے ووٹوں کی دوبارہ گنتی اور نتائج درستگی کی درخواست مسترد کردی گئی، اپنے فیصلے میں الیکشن کمیشن کا کہنا ہے کہ آر او کی رپورٹ کے مطابق نتائج درست جاری کیے گئے، فارم 45 کے تحت ہی فارم 47 جاری ہوا، درخواست گزار الیکشن ٹربیونل سے رجوع کرسکتے ہیں۔