گورنر پنجاب سے روٹری انٹرنیشنل سرگودھا کے وفد کی ملاقات، سیلاب متاثرین کی امداد کے حوالے سے آگاہی دی

سرگودھا (اُردو پوائنٹ اخبارتازہ ترین - اے پی پی۔ 20 ستمبر2025ء) گورنر پنجاب سردار سلیم حیدر خان سے روٹری انٹرنیشنل کلب کے وفد نے صدر مختارمرزا کی قیادت میں گورنر ہاؤس میں ملاقات کی اور روٹری کلب کی جانب سے سیلاب سے متاثرہ علاقوں میں امدادی اقدامات کے حوالے سے بتایا۔ گورنر پنجاب سردار سلیم حیدر خان نے کہا کہ پنجاب کے تمام ادارے اور مشینری سیلاب زدگان کی امداد اور بحالی میں مصروف عمل ہیں۔

روٹری انٹرنیشنل کلب سرگودھا کے صدر مختار مرزا نے ملاقات کے دوران گورنرپنجاب کو سیلاب کے دوران امدادی سرگرمیوں کے بارے تفصیلی آگاہ کیا۔ گورنر پنجاب سردار سلیم حیدر خان نے کہا کہ گزشتہ سالوں کی نسبت اس سال ملک بھر میں شدید بارشیں ہوئیں جس سے کسانوں کی فصلیں ، مال مویشی، مکانات اور قیمتی سرمایہ سیلابی ریلوں میں بہہ گیا، پنجاب حکومت نے بروقت اقدامات کر کے کئی انسانی جانی و مالی نقصانات کو ہونے سے بچایا۔

(جاری ہے)

گورنر پنجاب نے کہا کہ پیپلز پارٹی کی جانب سے سیلاب زدہ علاقوں میں راشن ، خشک خوراک، ادوایات اور میڈیکل کیمپ سمیت دیگر ضروریات زندگی کی اشیاء فراہم کرنے کا سلسلہ جاری ہے۔ گورنر پنجاب نے کہا کہ صوبے میں اتنے بڑے پیمانے پر آنے والے سیلاب کے بعد حکومت کو اکیلے نہیں بلکہ عوام کو بھی مل کر متاثرین کی امداد اور بحالی میں اپنا کردار ادا کرنا ہوگا۔

انہوں نے مزید کہا کہ فلاحی اداروں کو چاہئے کہ وہ سیلاب سے تباہ کاریوں کا جائزہ لیں۔ فلاحی ادارے ایک جگہ نہیں بلکہ پنجاب کے دیگر متاثرہ علا قوں میں بھی اپنی سرگرمیوں کوبڑھائیں تاکہ ہر متاثرہ افراد تک امداد پہنچ سکے۔ وفد نے بتایا کہ روٹری انٹرنیشنل کے نمائندگان پورے پاکستان میں سیلاب متاثرین کی خدمت میں مصروف عمل ہیں جسے گورنر پنجاب نے سراہا۔