آئی سی سی نے سچن ٹنڈولکر کا مذاق بنا دیا، ایسا کام کر ڈالا کہ بھارتی آگ بگولہ ہو گئے

لندن(اردو پوائنٹ تازہ ترین اخبار۔15جولائی 2019ء) کرکٹ ایک ایسا کھیل ہے جس میں کافی ’چھوٹ‘ بھی ہے اور کچھ ’مذاقیہ قوانین‘ بھی، انگلینڈ اور نیوزی لینڈ کے درمیان کھیلے گئے فائنل میچ کے بعد تو ہم سب کو معلوم ہو ہی گیا ہے۔ورلڈکپ کا میلہ انگلینڈ کے نام رہا، میچ ’ڈرامے‘ سے بھرا تھااور دنیا بھر میں کرکٹ کے مداح آخری لمحے تک ٹی وی سکرینوں کے سامنے بیٹھے رہے۔

آئی سی سی نے میگا ایونٹ کے دوران سوشل میڈیا پر بھی خاصی سرگرمی پیدا کی رکھی اور کئی مرتبہ مذاح سے بھرپور ٹویٹس بھی دیکھنے کو ملے لیکن گزشتہ رات انگلینڈ کے ورلڈکپ جیتنے کے بعد آئی سی سی کی جانب سے بین سٹوکس اور سچن ٹنڈولکر کی تصویر شیئر کی گئی لیکن اس کیساتھ ہی ایک ایسا ’مذاق‘ بھی کیا گیا جس نے بھارتیوں کو آگ بگولہ کر دیا۔

(جاری ہے)

آئی سی سی کی جانب سے کرکٹ ورلڈکپ کیلئے مختص ٹوئٹر ہینڈل سے کی سچن ٹنڈولکر اور فائنل کے مین آف دی میچ بین سٹوکس کی تصویر شیئر کرتے ہوئے لکھا گیا ”تاریخ کا سب سے بہترین کرکٹراور سچن ٹنڈولکر“ اور اس کیساتھ ہی ’آنکھ مارنے والی‘ ایموجی بھی استعمال کی گئی۔

بین سٹوکس کو انگلینڈ کیلئے تاریخی اننگز کھیلنے کے بعد بہترین کرکٹر کہا جا سکتا ہے یا نہیں؟ اس بارے میں بحث کی جا سکتی ہے مگر کرکٹ کے مداح سچن ٹنڈولکر کو بہترین کرکٹر ضرور مانتے ہیں جبکہ بھارتی تو انہیں ’بھگوان‘ قرار دیتے ہیں اور یہی وجہ ہے کہ بھارتیوں کو اپنے ’بھگوان‘ کیساتھ کیا گیا مذاق بالکل بھی پسند نہیں آیا جنہوں نے اس ٹویٹ پر تنقید شروع کر دی جبکہ پاکستانی اس مذاق سے خوب لطف اندوز ہوئے۔