بابر اعظم کے بھائی ’قلندر کے سکندر‘ پروگرام کیلئے منتخب

لاہور (اردو پوائنٹ تازہ ترین اخبار۔4مئی 2020ء ) لاہور قلندرز کے ورچوئل ٹیلنٹ ہنٹ پروگرام ’قلندر کے سکندر‘ کے لیے 16 کھلاڑیوں کا انتخاب کر لیا گیا۔ پاکستان سپر لیگ (پی ایس ایل) کی فرنچائز لاہور قلندرز کا ورچوئل ہنٹ پروگرام جاری ہے۔ ویڈیوز سے کوچنگ پینل نے چار، چار فاسٹ بولرز، وکٹ کیپرز سپنرز اور بیٹسمینوں کا انتخاب کیا۔ بیٹسمینوں میں فرحان صادق، محمد الیاس، سیف الرحمان اور سفیر اعظم شامل ہیں۔

4 فاسٹ بولرز میں احمد حسین، صدام آفریدی، محمد زاہد اور محمد بلال کا انتخاب ہوا ہے۔ اسی طرح سپنرز میں صلاح الدین، مرتضیٰ جمال، علی افضال اور دانیال اللّٰہ دتہ شامل ہیں۔ ورچوئل پروگرام کے تحت چار وکٹ کیپرز میں جنید علی فرزان، عالم احتشام الحق اور شاہد احمد شامل ہیں۔

(جاری ہے)

ڈائریکٹر لاہور قلندرز عاقب جاوید نے قلندر کے سکندر کے لیے منتخب ہونے والوں کو مبارکباد دی ہے۔

لاہور قلندرز نے نوجوان کھلاڑیوں کو پلیٹ فارم دیا، عاطف رانا انہوں نے کہا کہ قلندر کے سکندر پروگرام میں اچھا ٹیلنٹ سامنے آرہا ہے۔ عاقب جاوید کا کہنا تھا کہ 4 ہفتوں میں 64 کھلاڑی منتخب کریں گے۔ فرنچائز کے سی ای او عاطف رانا نے کہا کہ نوجوان کھلاڑیوں نے موجودہ حالات میں جس طرح دلچسپی ظاہر کی وہ قابل تعریف ہے۔ عاطف رانا کا کہنا تھا کہ مقابلہ بہت سخت ہے، پینل کو انتخاب کے لیے بہت مشکل پیش آرہی ہے۔ ان کا کہنا تھا کہ نوجوان پاکستان سے ہی نہیں پوری دنیا سے ویڈیوز بھجوا رہے ہیں۔