وکٹ کیپر محمد رضوان کو سرفراز احمد پر ترجیح دینے کا فیصلہ برقرار

لاہور (اردو پوائنٹ تازہ ترین اخبار۔3جولائی 2020ء ) قومی ٹیم انتظامیہ نے انگلینڈ کے دورے پر وکٹ کیپر محمد رضوان کو تجربہ کار سرفراز احمد پر ترجیح دینے کا فیصلہ کرلیا ہے جس کی وضاحت اپنے ایک انٹرویو میں بابراعظم نے بھی کردی کہ کورونا وائرس سے صحتیاب محمد رضوان ہی قومی ٹیسٹ ٹیم کے فرسٹ چوائس وکٹ کیپر ہوں گے اور چونکہ وہی پاکستان کیلئے کھیلتے رہے لہٰذا اب بھی ایسا ہی ہوگا۔

ان کا کہنا تھا کہ سرفراز احمد کی موجودگی کسی مشکل صورتحال کو جنم نہیں دے گی کیونکہ وہ ایک’’ ٹیم مین‘‘ ہیں۔

(جاری ہے)

بابراعظم کے مطابق وہ خود سرفراز احمد کے نائب کی حیثیت سے خدمات کی انجام دہی کر چکے ہیں جنہوں نے گرین شرٹس کو چیمپئنز ٹرافی 2017ء کا فاتح بنایا اور اس دوران ان سے بہت کچھ سیکھنے کا بھی موقع ملا تھا۔ یاد رہے کہ محمد رضوان کو گزشتہ سال دورہ آسٹریلیا میں بطور ٹیسٹ وکٹ کیپر ٹیم میں شامل کیا گیا تھا جہاں انہوں نے برسبین ٹیسٹ کی دوسری اننگز میں 95 رنز کی باری کھیلی تھی۔