میکسیکو، جم میں 180 کلو گرام وزن اٹھانے کے دوران خاتون ہلاک

میکسیکو سٹی (اردو پوائنٹ تازہ ترین اخبار ۔ یکم مارچ 2022ء ) میکسیکو کے ایک جِم میں انتہائی افسوسناک حادثہ پیش آیا ہے جس میں ایک ماں اپنی بیٹی کے سامنے ہی 180 کلوگرام وزن اٹھانے کی کوشش میں ہلاک ہوگئی۔ برطانوی میڈیا کے مطابق حادثہ دارالحکومت میکسیکو سٹی کے علاقے پیرل ویلو میں جم فٹنیس سپورٹ سینٹر میں پیش آیا جہاں جِم کی ایک 35 سے 40 سالہ ممبر خاتون نے 400 پاؤنڈ وزن اٹھانے کی کوشش کی تاہم سکت نہ ہونے پر وزن اُن کی گردن پر آگرا جس سے اُن گردن کی ہڈی ٹوٹ گئی۔

(جاری ہے)

خاتون کے ساتھ اُن کی بیٹی بھی کھڑی تھیں جب کہ جم ٹرینر بھی خاتون کے پاس موجود تھا۔ وزن گرنے پر پاس کھڑے ٹرینر اور جم میں موجود باقی لوگ خاتون کی طرف دوڑے اور وزن ہٹایا جس پر خاتون بینچ سے زمین پر بے جان جسم کے ساتھ آ گریں۔ رپورٹس کے مطابق آنکھوں کے سامنے ہوئی ماں کی اس غیر متوقع موت پر بیٹی گہرے صدمے میں ہے جسے حکام کی جانب سے نفسیاتی علاج معالجہ فراہم کیا جارہا ہے۔