ویسٹ انڈیز کیخلاف ون ڈے سیریز کیلئے قومی سکواڈ کا اعلان 20 مئی تک متوقع

لاہور (اردو پوائنٹ تازہ ترین اخبار ۔ 11 مئی 2022ء ) ویسٹ انڈیز کے خلاف ون ڈے سیریز کے لیے قومی سکواڈ کا اعلان 20 مئی تک متوقع ہے جب کہ کیمپ 23 یا 24 مئی تک لاہور میں لگائے جانے کا امکان ہے۔ ذرائع کے مطابق گزشتہ ماہ ویسٹ انڈیز کے خلاف سیریز کے لیے ٹیم کے کپتان بابر اعظم، سلیکٹرز، کوچ ثقلین مشتاق اور پی سی بی حکام سے مشاورت کی گئی۔ لاجسٹک امور کو حتمی شکل دینے کے بعد کیمپ اور سکواڈ کی تفصیلات کا باضابطہ اعلان کیا جائے گا۔

ون ڈے سکواڈ میں زیادہ تبدیلیاں نہیں کی جائیں گی جو آخری بار آسٹریلیا کے خلاف ہوم سیریز میں ایکشن میں نظر آئی تھی ۔ راولپنڈی کی متوقع سیاسی صورتحال کے پیش نظر لاہور میں کیمپ لگانے پر غور کیا گیا ہے۔ پی سی بی مقررہ وقت میں راولپنڈی کے بیک اپ وینیو کی بھی تصدیق کرے گا۔

(جاری ہے)

پاکستان اور ویسٹ انڈیز کے درمیان ون ڈے میچ 8، 10 اور 12 جون کو پنڈی کرکٹ سٹیڈیم میں شیڈول ہیں لیکن اسلام آباد میں پاکستان تحریک انصاف کے متوقع لانگ مارچ نے پاکستان کرکٹ بورڈ (پی سی بی) کو ویسٹ انڈیز کے خلاف ون ڈے سیریز کے مقام میں ممکنہ تبدیلی کے بارے میں سوچنے پر مجبور کر دیا ہے۔