ملتان سٹیڈیم پاکستان اور انگلینڈ کے درمیان ایک ٹیسٹ کی میزبانی کیلئے مضبوط امیدوار

لاہور (اردو پوائنٹ تازہ ترین اخبار ۔ 16 جولائی 2022ء ) ملتان کرکٹ اسٹیڈیم پاکستان اور انگلینڈ کے درمیان ایک ٹیسٹ کی میزبانی کے لیے مضبوط امیدوار کے طور پر سامنے آیا ہے۔ انگلش ٹیم ستمبر میں سات ٹی ٹونٹی کھیلنے کے لیے پاکستان کا دورہ کرے گی۔ وقت کی کمی اور لاجسٹک مسائل کی وجہ سے میچ صرف دو مقامات کراچی اور لاہور پر ہوں گے۔ ٹی ٹونٹی ورلڈ کپ کے بعد انگلش ٹیم نومبر میں تین ٹیسٹ میچز کے لیے پاکستان واپس آئے گی اور ملتان کو ایک ٹیسٹ کی میزبانی کے لیے سنجیدگی سے سوچا جارہا ہے ۔

(جاری ہے)

دریں اثناء انگلش کرکٹ بورڈ (ای سی بی) کا چار رکنی سکیورٹی وفد اتوار کو پاکستان پہنچ رہا ہے۔ وہ لاہور، کراچی اور راولپنڈی کے ساتھ ملتان کا بھی دورہ کریں گے اور مقامی اور پی سی بی حکام سے ممکنہ انتظامات پر بریفنگ لیں گے۔ انہیں راستوں، مقامات اور ہوٹلوں کے بارے میں بھی معلومات فراہم کی جائیں گی۔ سکیورٹی وفد کی رپورٹ کی روشنی میں حتمی فیصلے کیے جائیں گے۔