دورۂ پاکستان کیلئے نیوزی لینڈ کی ٹیسٹ ٹیم کا اعلان ، کین ولیمسن کپتانی سے دستبردار

آکلینڈ (اردو پوائنٹ تازہ ترین اخبار ۔ 15 دسمبر 2022ء ) نیوزی لینڈ کرکٹ بورڈ نے دورۂ پاکستان کیلئے اپنے 15 رکنی ٹیسٹ اسکواڈ کا اعلان کر دیا ہے۔ کین ولیمسن کی ٹیسٹ ٹیم کی قیادت سے دستبرداری کے بعد ٹم ساؤتھی کو نیا کپتان مقرر کیا گیا ہے، ٹام لیتھم نائب کپتان ہونگے جب کہ ٹرینٹ بولٹ نے دورے کیلئے عدم دستیابی ظاہر کی ہے۔ نیوزی لینڈ ٹیسٹ اسکواڈ میں لیگ اسپنر اش سودھی کی 4 سال بعد واپسی ہوئی ہے، اس کے علاوہ بلیئر ٹکنر اور گلین فلپس کو بھی نیوزی لینڈ اسکواڈ میں شامل کرلیا گیا۔

(جاری ہے)

کیوی اسکواڈ کے دیگر کھلاڑیوں میں مائیکل بریسویل، ٹوم بلنڈیل، ڈیون کانوے، میٹ ہینری، ٹام لیتھم، ڈیرل مچل، ہینری نکولس، اعجاز پٹیل، کین ولیم سن، نیل وینگر اور ول ینگ شامل ہیں۔ اس کے علاوہ دورۂ پاکستان کیلئے نیوزی لینڈ ون ڈے اسکواڈ کا اعلان 19 دسمبر کو کیا جائے گا۔ واضح رہے کہ پاکستان اور نیوزی لینڈ کے درمیان سیریز کا پہلا ٹیسٹ 26 دسمبر سے کراچی، دوسرا 3 جنوری سے ملتان میں کھیلا جائے گا۔