ایشیاء کپ، میچ نہ ہوا تو پاکستان سپر فور مرحلے کیلئے کوالیفائی کرلے گا

لاہور (اردو پوائنٹ تازہ ترین اخبار ۔ 2 ستمبر 2023ء ) ایشیا کپ میں پاک بھارت ٹاکرا بارش سے متاثر ہونے پر دوسری اننگز میں 20 اوورز مکمل ہونے کی صورت میں ڈک ورتھ لوئیس میتھڈ کے تحت فاتح ٹیم کا فیصلہ ہوگا جب کہ میچ بے نتیجہ ہونے کی صورت میں دونوں ٹیموں کو ایک ایک پوائنٹ ملے گا۔ ایشیاء کپ میں پاکستان اور بھارت کی ٹیموں کا میچ آج پالے کیلی کرکٹ اسٹیڈیم میں ہوگا، موسم بھی اس مقابلے میں رنگ میں بھنگ ڈالنے کیلئے تیار ہے، دن میں بارش کا امکان 60 فیصد ہے۔

کھیل بارش سے متاثر ہونے پر میچ کو نتیجہ خیز بنانے کیلیے دونوں ٹیموں کا کم ازکم 20،20 اوورز کھیلنا لازمی ہے، پہلی اننگز میں بھرپور بارش کی صورت میں شاید میچ نہ ہوسکے۔ دوسری اننگز میں اگر ایک ایسے موقع پر بارش ہوئی جب ہدف کا تعاقب کرنے والی ٹیم 20 اوورز کھیل چکی ہو تو فاتح کا فیصلہ ڈک ورتھ لوئیس میتھڈ پر کیا جائے گا، بے نتیجہ میچ کی صورت میں دونوں ٹیموں کو ایک ایک پوائنٹ ملے گا ، اس صورت میں نیپال کیخلاف 238 رنز سے فتح حاصل کرکے 3 پوائنٹس حاصل کرنیوالے قومی ٹیم سپر فور مرحلے میں جگہ بنالے گی جب کہ بھارتی ٹیم کو پیر کو نیپال کیخلاف میچ میں کامیابی حاصل کرنی لازمی ہوگی۔

(جاری ہے)