پی ایس ایل9، کراچی کے میچز کیلئے ٹریفک پلان سامنے آگیا

کراچی (اردو پوائنٹ تازہ ترین اخبار ۔ 24 فروری 2024ء ) پاکستان سپر لیگ (پی ایس ایل) 9 کے کراچی میں شیڈول میچز کیلئے ٹریفک پلان مرتب کرلیا گیا۔ پی ایس ایل 9 کے پلے آف اور فائنل سمیت 11 میچز کی میزبانی کراچی کے نیشنل اسٹیڈیم کو دی گئی ہے۔ ایونٹ کے دوسرے مرحلے کے میچز کا آغاز 28 فروری سے ہوگا اور 18 مارچ تک تمام میچز شہر قائد میں ہوں گے۔

(جاری ہے)

اس موقع پر کراچی ٹریفک پولیس نے تماشائیوں کیلئے پارکنگ کیلئے خصوصی ٹریفک پلان مرتب کیا ہے، وہ شائقین کرکٹ جو کارساز، ملینیم اور نیوٹاؤن سے آرہے ہیں، اپنی گاڑیاں پی ایس بی کوچنگ سینٹر /چائنا گراؤنڈ میں پارک کرسکیں گے۔

دوران میچ سہراب گوٹھ سے جانب نیپا، لیاقت آباد نمبر 10 سے حسن اسکوائر، پیپلز چورنگی سے یونیورسٹی روڈ، کارساز سے اسٹیڈیم، ملینیم تا نیوٹاؤن، اسٹیڈیم سگنل تا حسن اسکوائر ہر قسم کی ہیوی ٹریفک کا داخلہ ممنوع ہوگا۔