’سلیکشن کمیٹی نے بڑے ناموں کی کمزور ٹیم منتخب کی‘، محمد حفیظ کی موجودہ کمیٹی پر کڑی تنقید

لاہور (اردو پوائنٹ تازہ ترین اخبار ۔ 17 اپریل 2024ء ) سابق کپتان اور ٹیم ڈائریکٹر محمد حفیظ کا کہنا ہے کہ سلیکشن کمیٹی نے بڑے ناموں پر مشتمل کمزور ٹیم منتخب کی ہے۔ ’ایکسپریس نیوز‘ کے پروگرام میں گفتگو کرتے ہوئے سابق کپتان محمد حفیظ نے موجودہ سلیکشن کمیٹی پر کڑی تنقید کرتے ہوئے کہا کہ گھر بیٹھے کھلاڑیوں کو بلا کر ٹیم مضبوط بنانے کی کوشش کی، بابر اعظم کو کسی وجہ سے کپتانی سے ہٹایا گیا لیکن پھر بنا دیا گیا ۔

انہوں نے کہا کہ شاہین شاہ آفریدی کو 2 ماہ میں ہی ٹی ٹونٹی ٹیم کی کپتانی سے ہٹانے کی کوئی ٹھوس وجہ نہیں بتائی گئی، میں قومی ٹیم کو بہتر بنانے کیلئے 4 سالہ منصوبہ لایا تھا لیکن دو ماہ بعد ہی مجھے عہدے سے ہٹا دیا گیا۔ محمد حفیظ نے بابر اعظم کی کپتانی پر تنقید کرتے ہوئے کہا کہ وہ جب کپتان تھے تو ان پر ہر گروپ کو نوازنے جیسے الزامات بھی لگے۔

(جاری ہے)

واضح رہے کہ محمد عامر کی قومی ٹیم میں واپسی پر حفیظ اور سابق چیرمین پی سی بی رمیز راجا بھی متعدد مواقعوں پر انہیں تنقید کا نشانہ بنا چکے ہیں جب کہ سلیکشن کمیٹی کے رکن وہاب ریاض نے بھی سابق کرکٹر کے بیان کو ان کی اپنی ذاتی رائے قرار دیا تھا۔