بابر اعظم کی مداح کا سنچری مارنے پر مرسڈیز کار تحفے میں دینے کا اعلان

لندن (اردو پوائنٹ تازہ ترین اخبار ۔ 25 مئی 2024ء ) قومی کرکٹ ٹیم کے کپتان بابر اعظم کی مداح نے پاکستان اور انگلینڈ کے درمیان آج ہونے والے ٹی ٹونٹی میچ میں سنچری مارنے پر کھلاڑی کے لیے اپنے والد کی مرسیڈیز دینے کا اعلان کر دیا۔ روزنامہ جنگ کے مطابق فوٹو اینڈ ویڈیو شیئرنگ پلیٹ فارم انسٹاگرام پر برمنگھم میں موجود پاکستانی کرکٹ ٹیم کی پُر جوش جذباتی مداح کی ایک ویڈیو خوب وائرل ہو رہی ہے۔

وائرل ویڈیو میں ایک جذباتی مداح کو دیکھا اور سنا جاسکتا ہے جو قومی کرکٹ ٹیم سے جیت کی امید لگائی ہوئی ہے۔ مداح کے مطابق پاکستان اور انگلینڈ کی 4 ٹی ٹونٹی میچز کی سیریز کا لیڈز میں ہونے والے پہلے ٹی 20 میچ میں پاکستان کی جیت کے ارمان بارش میں بہہ گئے، جس کے بعد ساری امیدیں آج برمنگھم میں ہونے والے میچ سے جڑ گئی ہیں۔

(جاری ہے)

وائرل ویڈیو میں جذباتی مداح نبیہا خان نے صرف ایک جیت پر کپتان بابر اعظم کے لیے اپنے پپّا کی مہنگی گاڑی مرسیڈیز کی چابی دینے کا اعلان بھی کر دیا۔

مداح کا کہنا ہے کہ میں اپنے پپا کو بتا کر آگئی ہوں کہ اگر پاکستانی ٹیم آج کا میچ جیت گئی تو ان کی مرسیڈیز بابر اعظم کو دے دوں گی، پاکستان کی جیت پر ایسا ہزاروں مرسیڈیز قربان ہیں‘۔ خیال رہے کہ پاکستان اور انگلینڈ کے درمیان 4 میچز کی سیریز کا پہلا ٹی 20 انٹرنیشنل میچ بارش کے باعث منسوخ کردیا گیا تھا۔ تاہم آج اس سیریز کا دوسرا میچ برمنگھم میں کھیلا جائے گا، تیسرا میچ 28 مئی کو کارڈف میں اور آخری مقابلہ 30 مئی کو اوول میں کھیلا جائے گا۔