پی ایس ایل کیلئے کبھی پاکستان نہیں آؤنگا، کیوی آل راؤنڈر کی خود سے منسوب بھارتی میڈیا کی جھوٹی خبر کی تردید

جنگی ماحول کے دوران بھی غلط رپورٹنگ پر بھی بھارت کے نامور نیوز چینلز نے معذرت کی تھی، جس کے باعث انہیں دنیا بھر میں جگ ہنسائی کا سامنا کرنا پڑا تھا

ذیشان مہتاب منگل 13 مئی 2025 10:52

پی ایس ایل کیلئے کبھی پاکستان نہیں آؤنگا، کیوی آل راؤنڈر کی خود سے منسوب بھارتی میڈیا کی جھوٹی خبر کی تردید

لاہور (اردو پوائنٹ تازہ ترین اخبار ۔ 13 مئی 2025ء ) پاکستان کے ہاتھوں جنگی میدان میں بدترین شکست کے بعد بھارتی میڈیا نے پاکستان سُپر لیگ (پی ایس ایل) کو ایک بار پھر نشانے پر رکھ لیا۔

میڈیا رپورٹس کے مطابق نیوزی لینڈ کے 33 سالہ آل راؤنڈر ڈیرل مچل نے خود سے وابستہ بھارتی میڈیا کے دعوؤں کو مسترد کردیا، جس میں کہا گیا تھا کہ کیوی کرکٹر نے پی ایس ایل 2025ء کی معطلی کے بعد کہا کہ وہ کبھی واپس پاکستان نہیں جائیں گے۔

پاکستان سپر لیگ (پی ایس ایل) میں لاہور قلندرز کی نمائندگی کرنیوالے کیوی آل راؤنڈر ڈیرل مچل نے کہا کہ "پاکستان اور بھارت دونوں ہی میرے دل کے قریب ہیں، انھیں آپس میں الجھتا دیکھنا بہت ہی مشکل ہے، میری ہمدردیاں اس سے متاثر ہونے والے افراد کے ساتھ ہیں"۔

(جاری ہے)

انہوں نے اپنے بیان میں مزید کہا کہ "پی ایس ایل اور آئی پی ایل دونوں نے ہی میرے کیریئر میں اہم کردار ادا کیا، میں نے دونوں ہی ٹورنامنٹس میں بہت لطف اٹھایا، مجھے امید ہے کہ جلد امن ہونے سے ہمارا محبوب کھیل دوبارہ شروع ہوگا، میں مستقبل میں دونوں ممالک میں واپس لوٹنے کا منتظر ہوں گا"۔

کیوی کرکٹر کے بیان نے ایک مرتبہ پھر بھارتی میڈیا کا جھوٹ بے نقاب کردیا ہے ، جنگی ماحول کے دوران بھی غلط رپورٹنگ پر بھی بھارت کے نامور نیوز چینلز نے معذرت کی تھی، جس کے باعث انہیں دنیا بھر میں جگ ہنسائی کا سامنا کرنا پڑا تھا۔

وقت اشاعت : 13/05/2025 - 10:52:01