بنگلا دیش کیخلاف سیریز میں بابر اعظم نہیں تو کراؤڈ بھی نہیں ہوگا ، باسط علی کا بڑا دعویٰ

بابر اعظم اب تک 128 ٹی ٹونٹی میچز میں 3 سنچریوں اور 36 نصف سنچریوں کی مدد سے 39.83 کی اوسط سے 4223 رنز بنائے ہیں

ذیشان مہتاب ہفتہ 24 مئی 2025 12:13

بنگلا دیش کیخلاف سیریز میں بابر اعظم نہیں تو کراؤڈ بھی نہیں ہوگا ، باسط علی کا بڑا دعویٰ

کراچی (اردو پوائنٹ تازہ ترین اخبار ۔ 24 مئی 2025ء ) سابق ٹیسٹ کرکٹر باسط علی نے کہاہے کہ بنگلادیش کے خلاف ٹی 20 سیریز میں بابر اعظم نہیں ہیں تو کراؤڈ بھی نہیں ہوگا۔

پاکستان کے سابق کرکٹر باسط علی نے بنگلادیش کے خلاف تین میچوں کی ٹی 20 سیریز کے حوالے سے بڑا دعویٰ کیا ہے جو 28 مئی سے یکم جون تک لاہور کے قذافی اسٹیڈیم میں کھیلی جائے گی۔

پاکستان کرکٹ بورڈ (پی سی بی) نے سیریز کے لیے 16 رکنی اسکواڈ کا اعلان کیا جس میں سابق کپتان بابر اعظم، محمد رضوان اور شاہین شاہ آفریدی سمیت کئی سینئر کھلاڑیوں کو شامل نہیں کیا گیا۔

ٹیم سے بابر کو ڈراپ کرنا باسط علی کو پسند نہیں آیا اور انہوں نے دعوی کیا کہ اس کے نتیجے میں بنگلا دیش سیریز کے دوران کم ٹرن آؤٹ ہوگا۔

(جاری ہے)

بابر اعظم نے 2021ء، 2022ء اور 2024ء میں تین آئی سی سی مینز ٹی 20 ورلڈ کپ میں پاکستان کی قیادت کی، آخری بار گزشتہ سال دسمبر میں مختصر ترین فارمیٹ میں پاکستان کی نمائندگی کی تھی اور اس کے بعد سے وہ ٹیم سے باہر ہیں۔

انہیں اس سال مارچ میں نیوزی لینڈ کے خلاف گرین شرٹس کی حالیہ ٹی 20 سیریز میں بھی نظر انداز کیا گیا تھا۔

بابر اعظم اب تک 128 ٹی ٹونٹی میچز میں پاکستان کی نمائندگی کر چکے ہیں، انہوں نے تین سنچریوں اور 36 نصف سنچریوں کی مدد سے 39.83 کی معقول اوسط سے 4223 رنز بنائے ہیں۔

وقت اشاعت : 24/05/2025 - 12:13:59