جنوبی افریقہ نے ’چوکرز‘ کا لیبل اتار پھینکا، 27 سال بعد آئی سی سی ٹائٹل جیتنے میں کامیاب

ورلڈ ٹیسٹ چیمپئن شپ فائنل میں ایڈن مارکرم اور کپتان ٹیمبا باوما کی شاندار شراکت داری

ذیشان مہتاب ہفتہ 14 جون 2025 16:39

جنوبی افریقہ نے ’چوکرز‘ کا لیبل اتار پھینکا، 27 سال بعد آئی سی سی ٹائٹل جیتنے میں کامیاب

لندن (اردو پوائنٹ تازہ ترین اخبار ۔ 14 جون 2025ء ) آئی سی سی ورلڈ ٹیسٹ چیمپئن شپ کے فائنل میں جنوبی افریقہ نے ’چوکرز‘ کا لیبل اتار پھینکا، 27 سال بعد آئی سی سی ٹائٹل جیتنے میں کامیاب ہوگئے۔

لارڈز کے تاریخی سٹیڈیم کھیلے جارہے میچ کے چوتھے روز اننگز کا آغاز ہوا تو افریقی کپتان ٹمبا باوما محض ایک رنز کے اضافے کے بعد وکٹ گنوا بیٹھے، انہوں نے 66 رنز کی اننگز کھیلی، بعد ازاں ٹرسٹن اسٹبس بھی 8 رنز بناکر آؤٹ ہوئے۔

چوتھی وکٹ کیلئے ایڈن مارکرم اور ڈیوڈ بیڈنگھم نے 35 رنز کی پارٹنرشپ قائم کی تاہم مارکرم 136 رنز بناکر پویلین لوٹ گئے، انکی اننگز میں 15 چوکے شامل تھے۔

ڈیوڈ بیڈنگھم 21 رنز بناکر ناٹ آؤٹ رہے۔

آسٹریلیا کی جانب سے کپتان پیٹ کمنز، مچل اسٹارک اور جوش ہیزل ووڈ نے آج گرنے والی تینوں وکٹیں حاصل کیں۔

(جاری ہے)

اس سے قبل آئی سی سی ورلڈ ٹیسٹ چیمپئن شپ کے فائنل میں ایڈن مارکرم کی سنچری کی بدولت جنوبی افریقا کو کھیل کے چوتھے دن جیت کے لیے مزید 69 رنز درکار تھے۔

ورلڈ ٹیسٹ چیمپئن شپ کے فائنل کے تیسرے روز کھیل کے اختتام پر جنوبی افریقا نے 2 وکٹوں کے نقصان پر 213 رنز بنالیے، ایڈن مارکرم 102 اور کپتان ٹمبا باووما 65 بنا کر ناٹ آؤٹ ہیں، آسٹریلیا نے جنوبی افریقا کو جیت کے لیے 282 رنز کا ہدف دیا تھا۔ ویان ملڈر 27 رنز بنا کر آؤٹ ہوئے، ریکلٹن 6 رنز بنا سکے تھے، آسٹریلیا کی جانب سے دونوں وکٹیں مچل اسٹارک نے حاصل کیں۔

واضح رہے کہ آسٹریلوی ٹیم دوسری اننگز میں 207 رنز بنا کر آؤٹ ہوئی تھی، مچل اسٹارک نے 58 رنز کی اننگز کھیلی تھی۔ کاگیسو ربادا نے چار کھلاڑیوں کو پویلین کی راہ دکھائی تھی، لنگی نگیدی نے تین اور مارکو ینسن، ویان ملڈر نے ایک، ایک وکٹ حاصل کی تھی۔

وقت اشاعت : 14/06/2025 - 16:39:14