حیدرعلی کرفیو ٹائم کی خلاف ورزی کرتے ہوئے برسٹل سے مانچسٹر گئے

ٹیم مینجمنٹ نے نوجوان بیٹر کو شہر چھوڑنے سے منع کیا تھا لیکن وہ باز نہ آئے : ذرائع

ذیشان مہتاب ہفتہ 9 اگست 2025 11:54

حیدرعلی کرفیو ٹائم کی خلاف ورزی کرتے ہوئے برسٹل سے مانچسٹر گئے

لاہور (اردو پوائنٹ تازہ ترین اخبار ۔ 9 اگست 2025ء ) قومی بلے باز حیدر علی پر برطانیہ میں مبینہ زیادتی کے الزام کے تحت درج مقدمے کی تحقیقات جاری ہیں جبکہ انہیں شہر چھوڑنے سے بھی منع کر دیا گیا ہے تاہم اب انکشاف ہوا ہے کہ حیدر علی 23 جولائی کو کرفیو ٹائم کی خلاف ورزی کرتے ہوئے مانچسٹر گئے تھے ۔

(جاری ہے)

نجی ٹی وی سماء نیوز کے ذرائع کے مطابق ٹیم مینجمنٹ نے حیدر علی کو شہر سے باہر جانے سے منع کیا تھا لیکن منع کیے جانے کے باوجود وہ کرفیو ٹائم کی خلاف ورزی کرتے ہوئے 23 جولائی کو برسٹل سے مانچسٹر گئے ، حیدرعلی کو 5 اگست کو میچ کے آخری روز ڈریسنگ روم سے مانچسٹر پولیس نے گرفتار کیا تھا ۔

مانچسٹر پولیس نے بتایا کہ چار اگست کو جنسی زیادتی کی شکایت موصول ہوئی جس پر ایکشن لیتے ہوئے 24 سالہ شخص کو گرفتار کیا ۔

پولیس کا کہنا ہے کہ واقعہ 23 جولائی کو مانچسٹر میں پیش آیا ، ملزم کو ضمانت پر رہا کر دیا گیا ہے اور تحقیقات جاری ہیں ، متاثرہ خاتون کو افسران کی جانب سے مدد فراہم کی جا رہی ہے۔

یاد رہے کہ پاکستان کرکٹ بورڈ نے گزشتہ روز ایکشن لیتے ہوئے حیدر علی کو معطل کر دیا تھا ۔

وقت اشاعت : 09/08/2025 - 11:54:59