قانون مجرم کو جن سہولیات کی فراہمی کیلئے پابند کرتا ہے نگران حکومت کی جانب سے محمد نواز شریف کووہ فراہم کی جارہی ہیں ،

لاہور۔17جولائی(اُردو پوائنٹ اخبارتازہ ترین - اے پی پی۔ 17 جولائی2018ء) قانون حکومت مجرم کو جن سہولیات کی فراہمی کے لیے پابند کرتا ہے محمد نواز شریف کو نگران حکومت کی جانب سے وہ سہولیات فراہم کی جارہی ہیں ، نواز شریف کو جیل میں سہولیات کی فراہمی کے حوالے سے شہباز شریف کے خط کا جواب نگران وزیر اعلیٰ ڈاکٹرحسن عسکری دے چکے ہیں، ان خیالات کا اظہار صوبائی وزیر خزانہ وقانون ضیاء حیدر رضوی نے اپنے آفس میں میڈیا سے ملاقات کے دوران کیا۔

انہوں نے کہا کہ جیلوں کی موجودہ حالت وہی ہے جو گزشتہ حکومت چھوڑ کر گئی تھی، نگران وزیر اعلیٰ پنجاب جیل میں سہولیات کی فراہمی کو یقینی بنا رہے ہیں،انہوں نے کہا کہ ڈالر کی قیمت میں اضافے سے پیدا ہونے والے مالی مسائل کا تعلق وفاقی حکومت سے ہے،گزشتہ حکومت کی ناکام پالیسیاں مالی بحران کا سبب بن رہی ہے۔

(جاری ہے)

صوبائی وزیر نے کہا کہ سابق وزیر اعظم کو جیل میں وہ سب سہولیات میسر تھیں جو گزشتہ حکومت خود قیدیوں کو فراہم کر رہی تھی۔

جیلوں کی موجودہ حالت خود منتخب حکومت ہی کی مرہون منت ہے اس میں نگران حکومت کا کوئی ذاتی تعصب شامل نہیں تھا ۔ نگران حکومت مکمل طور پر غیر جانبدار ہے ۔ ڈالر کی حالیہ قیمتوں کے حوالے سے سوال کے جواب میں صوبائی وزیر نے کہا کہ ملکی معیشت کے عدم استحکام کے حوالے سے چیمبر آف کامرس کے خدشات درست ہیں ،ان سے تحفظ کے لیے صنعتی بحران کو روکنا ہو گا۔

ملکی معیشت کے تحفظ کے لیے درآمدات کی قیمتوں پر کنٹرول ، صنعت کاری کا فروغ اور کاروبار کی آسانی پیدا کرنی ہو گی ۔ وفاقی حکومت سے درخواست گزار ہیں کہ اس ضمن میں فوری نوعیت کے مسائل حل کے لیے ضروری اقدامات اُٹھا ئے جائیں ۔قانون نگران حکومت کو جس حد تک اجازت دیتا ہے اس حد تک اپنا کردار ادا کریں گے۔ انہوں نے مزید کہا کہ تاجر برادری کے تحفظات کی دوری کے لیے چیمبر کے ساتھ بیٹھ کر دفاعی حکمت عملی وضع کرنے کے لیے تیار ہیں۔چیمبر کے اراکین حکومت کے سٹیک ہولڈز ہیں، ان کی مشکلات حکومت کی مشکلات ہیں۔