دولہے کو کورونا ویکسین کی سلامی

دولہا خوبصورت اور رنگ برنگے موتیوں کی لڑیوں سے بناہواروائتی سہرا باندھے سٹیج پر بیٹھا ہوا تھا،اس نے سر پر کُلہ بھی پہن رکھا تھا اورکُلہ کے اوپر سِلمہ ستارہ کے کام سے تیار کردہ سرخ رنگ کا دوپٹہ بھی اوڑھ رکھا تھا تاکہ اسے پیار کی نظر بھی نہ لگ سکے۔آج کل کے دور میں ایسے روائتی انداز میں سجا ہوادولہا کم ہی دیکھنے کو ملتا ہے۔

،دولہے کے چہرے پر خوشی کے آثار سہرے کے پیچھے سے چھلک رہے تھے وہ دل ہی دل میں اس بات کا بھی شکر ادا کررہا تھا کہ اب  وہ بڑے سکون اور اطمینان سے اپنی دلہن کو بیاہ کر اپنے گھر لے جائے گا،اسے کورونا کی وجہ سے لاک ڈاون یا دیگرسخت پابندیوں کا سامنا نہیں کرنا پڑرہاتھا۔اُدھرباراتی بھی کھانا کھانے کے بعد خوش گپیوں میں مصروف تھے،بیک گراونڈ میں شادی بیاہ کے گانے بج رہے تھے۔

(جاری ہے)

دولہا اور دلہن کے رشتہ داروں اور عزیزواقارب نے ایک ایک کرکے سٹیج پر جاکر دولہاکو سلامی دینا شروع کردی۔ سلامی دینے کے لئے جو کوئی بھی سٹیج پر آتا پہلے دولہا کو سلام کرکے ہاتھ ملاتا اور پھر تصویریں کھینچوانے کے بعد سلامی کے طور پر نقد رقم دے کروہاں سے اٹھ جاتا تاکہ دوسروں کو بھی موقع مل سکے۔
دلہن کے رشتہ دارسلامی دے رہے تھے کہ دو افرادچہرے پر ماسک لگائے سٹیج پرآئے اور دولہا کو سلام کیا۔

دولہا نے انھیں دلہن کا رشتہ دار سمجھ کر بڑے ادب سے سلام کیااور اپنے دائیں بائیں بٹھا لیا۔دولہے والے سمجھے رہے تھے کہ شائد دلہن کے رشتہ دار ہیں جبکہ دلہن والے سمجھے کہ دولہا کے رشتہ دار ہیں۔اسی کشمکش میں ان کی تصویریں بننے لگیں۔ان میں سے ایک شخص دولہا کو کچھ کہنے کے لئے نزدیک ہوا تودولہا سمجھا شائد سلامی دینے لگا ہے لیکن اگلے ہی لمحے دولہا حیرت میں مبتلا ہوگیا،اُس کا رنگ اُڑگیا کیونکہ وہ دونوں دلہن کے رشتہ دارنہیں تھے بلکہ محکمہ صحت کی ٹیم کے ممبر تھے جودولہا سے پوچھنے آئے تھے کہ کورونا سے بچاو کی ویکسین لگوائی ہے کہ نہیں؟ دولہا نے کبھی ہاں کبھی ناں میں ملا جلاجواب دیا تو ٹیم نے دولہا سے کورونا ویکسین کا سرٹیفیکیٹ مانگ لیا۔

آخر کار دولہاکو سچائی بتانا ہی پڑی کہ اس نے کورونا ویکسین نہیں لگوائی۔محکمہ صحت کی ٹیم نے دولہا کویاددہانی کروائی کہ کورونا ایس او پیز کے مطابق ویکسین لگوانا بہت ضروری ہے۔اب دولہے کے سامنے ایک ہی راستہ بچا تھا،وہ یہ کہ اگر وہ دلہن کو بیاہ کر لے جاناچاہتا ہے تو اسے پہلے ویکسین لگوانا پڑے گی۔آخرکچھ دیر سوچنے کے بعد دولہا نے ویکسین لگوانے کی حامی بھرلی۔

محکمہ صحت کی ٹیم نے اپنے پاس رکھا ہوامیڈیکل بیگ کھولا اور دولہے کو کورونا سے بچاو کی ویکسین لگادی۔یہ ایک دلچسپ منظر بن گیا تھا،سر پر کُلہ اورسہرا باندھے دولہاویکسین لگوارہا تھا۔شادی میں آئے کچھ شرارتی نوجوان دولہا کو ویکسین لگواتا دیکھ کر آپس میں سرگوشیاں کرتے ہوئے چپکے سے ہنس رہے تھے کہ محکمہ صحت کی ٹیم نے دولہا کو سلامی میں کورونا ویکسین لگادی ہے۔

دولہا کو کورونا ویکسین کی سلامی دینے کے بعد محکمہ صحت کی ٹیم نے باراتیوں کی بھی آو بھگت کرتے ہوئے انھیں بھی کورونا ویکسین لگائی۔ جب دولہا اور باراتیوں کو ویکسین لگادی گئی توبعد میں دلہن کی رخصتی کردی گئی۔یہ واقعہ حال ہی میں پنجاب کے شہر جھنگ میں پیش آیا ہے جو سوشل میڈیا پر بہت مشہور ہوا ہے۔
سوشل میڈیا صارفین نے محکمہ صحت کی ٹیم کی جانب سے دولہا اور باراتیوں کو ویکسین لگانے کے اقدام کو سراہتے ہوئے اسے دیگرشادی کرنے کے خواہشمند افراد کے لئے ایک اچھی مثال قرار دیا ہے۔

ماہرین صحت کا بھی کہنا ہے کہ اگر کوئی دولہا یا دلہن ویکسین کے بغیر شادی کی تقریب کا اہتمام کرتے ہیں تو یہ نہ صرف ان کے لئے بلکہ باراتیوں کے لئے بھی ایک بڑا خطرہ ثابت ہوسکتا ہے کیونکہ شادی تقریبات میں کورونا ایس او پیز پر عملدرآمد کروانا مشکل ہوجاتا ہے یہی وجہ ہے کہ امریکہ سمیت دیگر ترقی یافتہ ممالک میں شادی سے قبل دولہا اور دلہن کے میڈیکل سرٹیفیکیٹ کے ساتھ کورونا ویکسین کا سرٹیفیکیٹ بھی لازمی قرار دے دیا گیا ہے۔

ہمارے ملک میں شادی سے قبل دولہا،دلہن کا میڈیکل چیک اپ کروانے کا کوئی رواج نہیں جس کی وجہ سے شادی کے بعداکثردولہا،دلہن کو بہت سی پیچیدگیوں کا سامنا کرنا پڑتا ہے اور بعض اوقات یہ پیچیدگیاں اس قدر بڑھ جاتی ہیں کہ نوبت طلاق تک پہنچ جاتی ہے۔اس لئے ضروری ہے کہ رشتہ طے کرتے وقت دیگر ضروری باتوں ے ساتھ لڑکے اورلڑکی کا میڈیکل چیک اپ بھی کروالیا جائے تو بہت سے گھر اجڑنے سے بچ سکتے ہیں۔