محمود کے حملے

میانوالی کے شہنشاہ محمود نے درباریوں کے جھرمٹ میں اپنی مہمات کے بارے میں مفتوحہ قوم کو آگاہ کیا ہے۔ آپ نے فرمایا کہ غزنی کے محمود کی طرح آپ بھی بار بار حملے کریں گے۔ میانوالی کے محمود کا نشانہ ہندوستا ن کا دارالحکومت نہیں بلکہ اسلام کے جنوبی ایشیائی ” قلعے “ کا دارالخلافہ اسلام آباد ہوگا۔ غزنی کے محمود کے بر عکس میانوالی کے شہنشاہ محمود کو اپنی مہمات میں پانچ دروازوں والی بلٹ پروف ایس یو وی گاڑیاں اور بم پروف کنٹینربھی میسر ہونگے۔

آپ کے ہراول دستے کی مضبوطی میں بھی اضافہ ہوتا جارہا ہے۔ تازہ ترین اضافہ کشمیر کے پنج ہزاری سلطان کا ہے ۔ شہنشاہ کے دربارِی روحانی پیشوا نے، خمار آلود آنکھوں والے پنج ہزاری سلطان کی آمد پر فرمایا ہے کہ ”سلطان اپنی شامیں برباد کئے رکھتا ہے، مگر کرپشن کا الزام اس پہ کبھی نہ لگا“۔

(جاری ہے)

سبحان اللہ۔شہنشاہ حضور کا اقبال اسی طرح سے بلند ہو اور لشکر میں ایسے ہی چار چاند اور لگیں۔

شہنشاہ کی سلطنت میں پاشا سالار کے لگائے ہوئے آٹھ چاند بھی خوب روشنی دے رہے ہیں۔ محمود بادشاہ کو آخر بیس مہینے کے بعد اپنے ” مفتوحہ علاقے “ کی خیر خبر لینے کا خیال بھی آگیا ۔ آپ نے اپنے مفتوحہ علاقے میں پورا زور لگانے کا اعلان بھی فرمایاہے، حالانکہ شہنشاہ سلامت کو اپنی مہمات کے سلسے میں سات سمندر پار کا سفر بھی درپیش ہے۔ بھاری بھرکم نمک کو حلال کرنے کے لئے آپ کو رچمنڈ پارک کے معرکے میں سابق برادر نسبتی کے شانہ بشانہ حسبِ سابق دادِ شجاعت دینی پڑ سکتی ہے۔

موٴرخین کا خیال ہے کہ اسلام آباد کو فتح کرنے کے لا حاصل معرکے بجائے آپ کو اپنے مفتوحہ علاقے کے عوام کو سکھ کا سانس دینے کے لئے سترہ حملے کرنے چاہئیں۔ آپ کا پہلا حملہ خیبر پختونخواہ میں دہشت گردی کے خلاف ہونا چایئے، دوسرا حملہ پولیو کے خلاف ہونا چاہئے، تیسرا حملہ اغوا برائے تاوان کے خلاف ہونا چاہئے، چوتھا حملہ ڈکیتوں، چوروں، راہزنوں کے خلاف ہونا چاہئے، پانچواں حملہ جعلی دواوٴں اور جعلی خوردنی اشیاء تیار کرنے والوں کے خلاف ہونا چاہئے ،چھٹا حملہ کرپشن کے خلاف ہونا چاہئے، ساتواں حملہ مہنگائی کے خلاف ہونا چاہئے، آٹھواں حملہ سرکاری ہسپتالوں کی بری حالت کے خلاف ہونا چاہئے،نواں حملہ سرکاری اسکولوں کی تباہ حالی کے خلاف ہونا چاہئے، دسواں حملہ سوک سہولتوں کی ناگفتہ بہ صورتحال کے خلاف ہونا چاہئے، گیارہواں حملہ ڈرگ مافیا کے خلاف ہونا چاہئے، بارہواں حملہ قبضہ مافیا کے خلاف ہونا چاہئے ، تیرہواں حملہ خلافِ میرٹ بھر تیوں کے خلاف ہونا چاہئے چودھواں حملہ نا انصافی کے خلاف ہونا چاہئے، پندرہواں حملہ وی آئی پی کلچر کے خلاف ہونا چاہئے، سولہواں حملہ جیسا کہ آپ نے خود فرمایا ٹمبر مافیا کے خلاف ہونا چاہئے، اور سترہواں حملہ بلدیاتی اداروں کے قیام کیلئے ہونا چاہئے۔

اگر میانوالی کے شہنشاہ محمود نے یہ اصلی حملے کرنے کے بجائے اسلا م آباد پر کنٹینری حملے جاری رکھے تو یاد رکھے کہ خیبر پختونخواہ کے عوام نے پانی پت کے2008 اور2013 کے معرکوں میں سومنات کے کئی بت پاش پاش کر دئے تھے، یہ راندہ درگاہ بت یا تو ” گناہوں“ سے بچتے ہوئے ” ثواب “ کما رہے ہیں یا ” ایزی لوڈ “ کی یادوں میں کھوئے رہتے ہیں۔ ویسے یہ میانوالی کا محمود بھی عجیب ہے، غزنی کے محمود نے توخود ایاز کو لاہور سونپ دیا تھا جبکہ میانوالی کا محمود ، اسپیکرایاز کی کرسی چھیننا چاہتا ہے وہ بھی قانونی مار سے۔