اقوام متحدہ کی کشمیر قرار دادوں پر عملدرآمد میں ہی مسئلہ کشمیر کا پرامن حل ہے ،ْناصر حسین ڈار

جمعرات 31 مئی 2018 15:08

مظفرآباد(اُردو پوائنٹ اخبارتازہ ترین - این این آئی۔ 31 مئی2018ء) آزاد کشمیر حکومت کے وزیر بحالیات و ٹرانسپورٹ ناصر حسین ڈار نے کہا ہے کہ معاشی طور پر مضبوط اور مستحکم پاکستان ہی مقبوضہ کشمیر کی آزادی کا ضامن ہے اور اقوام متحدہ کی کشمیر قرار دادوں پر عملدرآمد میں ہی مسئلہ کشمیر کا پرامن حل ہے ۔ میڈیا کے نمائندوں سے گفتگو کے دوران انہوں نے مزید کہا کہ سی پیک منصوبوں پر عملدرآمدسے پاکستان اور آزادکشمیر کی معیشت پر دوررس نتائج مرتب ہوں گے ۔

(جاری ہے)

پاکستان اب پاک چین راہداری کا اہم مرکز ہے اور یہ لاجسٹک ، تجارت اور سرمایہ کاری کا اہم راستہ اور منزل ہے ۔ان منصوبوں پر عملدرآمد کرنے سے پاکستان کا شماردنیاکی بڑی اور اہم معیشتوں میں ہوگا ۔ یہی وجہ ہے کہ بھارت اور دیگر پاکستان دشمن قوتیں علاقائی امن کو خراب کرنے کی سازشوں میں مصروف ہیں تاکہ پاکستان میں اقتصادی ترقی کا پہیہ جام ہو جائے ان حالات میں ہماری مسلح افواج کی ذمہ داریاں کئی گنا بڑھ جاتی ہیں اور وہ ہماری سرحدوں کی حفاظت کے ساتھ ساتھ ملکی امن کے قیام کو یقینی بنانے کے لیے بھی کوشاںہیں اور ملک سے دہشتگردی کے خاتمہ کے لیے عملی اقدامات کیے جارہے ہیں جو کہ لائق تحسین ہیں ۔