ْپیپلز پارٹی کو کراچی اور سندھ سے کلین سویپ کے دعوے کرتے ہوئے شرم نہیں آتی،خرم شیر زمان

لوگ منتیں مان رہے ہیں اس بار کیسی ہی مشکل کیوں نہ آجائے، لیکن پی پی کی حکومت نہ آئے، جنرل سیکریٹری پی ٹی آئی کراچی

بدھ 20 جون 2018 21:00

کراچی (اُردو پوائنٹ اخبارتازہ ترین - این این آئی۔ 20 جون2018ء) پاکستان تحریک انصاف کراچی کے جنرل سیکریٹری و سندھ اسمبلی میں پی ٹی آئی کے سابق پارلیمانی لیڈر خرم شیر زمان نے کہا ہے کہ آج پچا س سال سے پی پی کو ووٹ دینے والے اس کے خلاف ہو گئے ہیں۔ اس کے باوجود پیپلز پارٹی کو کراچی اور سندھ سے کلین سویپ کے دعوے کرتے ہوئے شرم نہیں آتی۔ یہ باتیں انہوں نے پارٹی سیکرٹریٹ ’’انصاف ہائوس‘‘ کراچی سے جاری کردہ اپنے ایک خصوصی بیان میں کہیں۔

انہوں نے مزید کہا کہ روزگار، تعلیم، صحت اورترقیاتی کام دور کی بات، گڈاپ کے ڈملوٹی گوٹھوں کو پینے کا پانی تک فراہم نہیں کیا گیا۔ آج وہاں کی خواتین سروں پر پانی کے برتن رکھ کر پانی کی قلت کے خلاف فلک شگاف نعرے لگانے پر مجبور ہیں۔

(جاری ہے)

یہ گوٹھوں کے لوگ سندھ کارڈ کی وجہ سے پی پی کو ووٹ دیتے تھے لیکن آئندہ انتخابات میں پی پی والے کیا منہ لے کر ان سے ووٹ مانگیں گے۔

انہوں نے کہا کہ پیپلز پارٹی نے پورے سندھ کا جو حال کیا ہے، اس کے خلاف پورا سندھ پی پی کے خلاف اٹھ کر کھڑا ہوگیا ہے۔ لوگ منتیں مان رہے ہیں کہ اس بار کیسی ہی مشکل کیوں نہ آجائے، لیکن پی پی کی حکومت نہ آئے۔ اس کے باوجود پی پی رہنمائوں کی ہٹ دھرمی قابل دید ہے۔ وہ بے شرمی کے ساتھ لوگوں سے ووٹ بھی مانگیں گے اور الیکشن میں حصہ بھی ضرور لیں گے لیکن ہمیں یقین ہے کہ پی پی اگلی بار پورے سندھ بالخصوص کراچی سے بری طرح ہار کر پورے پاکستان سے رسوا ہوگی۔ جیت پاکستان تحریک انصاف کی ہوگی۔