Live Updates

عام انتخابات، انتخابی اکھاڑے میں کس سیاستدان نے کتنا خرچہ کیا

عمران خان نے این اے 131 سے انتخابی مہم پر 9 لاکھ 97 ہزار 925 ، این اے 53 میں انتخابی مہم پر 38 لاکھ 11 ہزار سات سو پچاس روپے خرچ کیے شہباز شریف نے این اے 132 19 لاکھ 34 ہزار 447 روپے خرچ کئے بلاول بھٹو زرداری نے این اے 200 سے میں 33 لاکھ 36 ہزار 106 روپے خرچ کئے فریال تالپو نے الیکشن مہم میں 18 لاکھ 26 ہزار روپے خرچہ دکھایا حمزہ شہباز نے 18 لاکھ 50 ہزار 625 روپے،علیم خان 39 لاکھ 84 ہزار500 روپے خرچ کئے

ہفتہ 4 اگست 2018 19:54

عام انتخابات، انتخابی اکھاڑے میں کس سیاستدان نے کتنا خرچہ کیا

اسلام آباد(اُردو پوائنٹ اخبارتازہ ترین - آن لائن۔ 04 اگست2018ء) الیکشن کمیشن نے عام انتخابات میں کامیاب قراردئیے گئے امیدواروں کو انتخابی مہم کے دوران اخراجات کی تفصیلات جمع کروانے کا پابند کرتے ہوئے کہا ہے کہ تفصیلات جمع نہ کرانے والے امیدواروں کو سرکاری نوٹی فکیشن جاری نہیں کیا جائے گا۔ میڈیارپورٹس کے مطابق الیکشن کمیشن کی ہدایت کی روشنی میں کامیاب امیدوار انتخابی اخراجات کی تفصیلات متعلقہ ریٹرننگ افسران کے پاس جمع کرارہے ہیں۔

پاکستان کے متوقع وزیر اعظم عمران خان نے ملک کے چاروں صوبوں سے انتخابات میں حصہ لیا۔ انہوں نے قومی اسمبلی کے 5 حلقوں سے پنجہ آزمائی کی اور پانچوں میں کامیابی حاصل کی۔ عمران خان نے لاہور سے قومی اسمبلی کے حلقہ این اے 131 سے انتخابی اخراجات کی تفصیلات جمع کروا دی ہیں، جس کے مطابق انہوں نے حلقے میں انتخابی مہم پر 9 لاکھ 97 ہزار 925 روپے خرچ کیے۔

(جاری ہے)

اس کے علاوہ عمران خان نے اسلام آباد سے قومی اسمبلی کے حلقہ این اے 53 میں انتخابی مہم پر 38 لاکھ 11 ہزار سات سو پچاس روپے خرچ کیے۔ مسلم لیگ (ن) کے صدر میاں شہباز شریف لاہور سے قومی اسمبلی کے حلقہ این اے 132 سے کامیاب ہوئے ہیں، اس حلقے میں انہوں نے 19 لاکھ 34 ہزار 447 روپے خرچ کیے، ریٹرننگ افسر کے سامنے جمع کرائی گئی تفصیلات کے مطابق شہبازشریف نے گاڑیوں میں ایندھن کی مد میں 6 لاکھ جب کہ اشتہاری مہم پر11 لاکھ روپے خرچ کیے۔

پاکستان پیپلز پارٹی کے چیئرمین بلاول بھٹو زرداری لاڑکانہ سے قومی اسمبلی کی نشست این اے 200 سے کامیاب قرار دیئے گئے ہیں، انہوں نے اپنے وکیل آصف سومرو کے توسط سے ریٹرننگ افسر کے سامنے انتخابی اخراجات کی تفصیلات جمع کرادی ہیں جس کے تحت انہوں نے حلقے میں 33 لاکھ 36 ہزار 106 روپے خرچ کئے۔ آصف زرداری کی ہمشیرہ فریال تالپور پاکستان پیپلز پارٹی کے ٹکٹ پر سندھ اسمبلی کے حلقہ پی ایس 10 سے کامیاب قرار پائی ہیں، انہوں نے الیکشن مہم میں 18 لاکھ 26 ہزار روپے خرچہ دکھایا ہے۔

کم وبیش 10 برس تک پنجاب کے وزیر قانون رہنے والے رانا ثنائ اللہ اس مرتبہ صوبائی اسمبلی کی نشست پر ناکام ہوگئے تاہم قومی اسمبلی میں انہوں نے رسائی حاصل کرلی ہے۔ انہوں نے ایم این اے کی نشست کے لیے 32 لاکھ 25 ہزار روپے خرچ کیے۔ مسلم لیگ (ن) کے رہنما حمزہ شہباز کی جانب سے این اے 124 کے ریٹرننگ افسر کے روبرو انتخابی اخراجات کی جو تفصیلات جمع کروائی گئی ہیں ان کے مطابق انہوں نے 18 لاکھ 50 ہزار 625 روپے خرچ کیے۔ تحریک انصاف کے رہنما علیم خان نے لاہور سے قومی اسمبلی کے حلقہ این اے 129 سے کامیابی حاصل کی، انہوں نے اپنی انتخابی مہم میں 39 لاکھ 84 ہزار500 روپے کا خرچہ ظاہر کیا ہے۔