بابائے قوم کشمیر کو پاکستان کیلئے انتہائی ناگزیر سمجھتے تھے‘مشتاق منہاس

بدھ 11 ستمبر 2019 13:09

مظفرآباد(اُردو پوائنٹ اخبارتازہ ترین - این این آئی۔ 11 ستمبر2019ء) آزاد جموںو کشمیر کے وزیر اطلاعات مشتاق احمد منہاس نے کہا کہ بابائے قوم کشمیر کو پاکستان کیلئے انتہائی ناگزیر سمجھتے تھے۔ اسی لئے انہوں نے کشمیر کو پاکستان کی شہ رگ قرار دیا۔ انہوں نے کشمیریوں کی تحریک آزادی کی کھلے الفاظ میں حمایت کی۔

(جاری ہے)

انہوں نے مسئلہ کشمیرکو حل کرنے کیلئے بھرپور کوششیں کیں ان کی یہ دلی خواہش تھی کہ کشمیر بھارتی تسلط سے آزاد ہوکرپاکستان کا حصہ بنے آج کشمیری قائداعظم کے فرمودات کی روشنی میں تحریک آزادی کشمیر اور دفاع پاکستان کی جنگ لڑرہے ہیں۔

بھارت نے کشمیریوں کو ان کے جائز حقوق اور حق خودارادیت سے روکنے کیلئے اپنی آٹھ لاکھ سے زائد فوج مقبوضہ کشمیر میں تعینات کررکھی ہے۔ لیکن ان تمام باتوں کے باوجود کشمیری ریاست جموں وکشمیر کی آزادی اور اس کے پاکستان کے ساتھ الحاق کی جدوجہد پوری شدت سے جاری رکھے ہوئے ہیں۔بابائے قوم حضرت قائداعظم کے یوم وفات کے دن ہم اس بات کا عہد کرتے ہیں کہ ہم اپنی جان، مال ، عزت آبرو پاکستان کے دفاع اور کشمیر کی آزادی کیلئے قربان کرنے سے ہرگز دریغ نہ کریں گے۔