وزیر اعظم عمران خان کی زیر صدارت اعلی سطحی اجلاس

کرونا وائرس کے پیش نظر مجموعی ملکی معاشی صورتحال کا جائزہ اورحکومت کی جانب سے ریلیف کی فراہمی کے حوالے سے ممکنہ آپشنز اور تجاویز پر تفصیلی غور کیاگیا

پیر 23 مارچ 2020 22:46

وزیر اعظم عمران خان کی زیر صدارت اعلی سطحی اجلاس

اسلام آباد ۔ (اُردو پوائنٹ اخبارتازہ ترین - اے پی پی۔ 23 مارچ2020ء) وزیر اعظم عمران خان کی زیر صدارت کرونا وائرس کی وجہ سے ملکی معیشت پر ممکنہ اثرات اور عوام کو ریلیف فراہم کرنے کے اقدامات کے حوالے سے اعلی سطح اجلاس پیر کو منعقد ہوا۔اجلاس میں وفاقی وزراء حماد اظہر، وزیر منصوبہ بندی اسد عمر، وزیر برائے نیشنل فوڈ سیکیورٹی مخدوم خسرو بختیار، مشیر خزانہ عبدالحفیظ شیخ، ڈاکٹر عشرت حسین، عبدالرزاق داود، چیف آف آرمی سٹاف جنرل قمر جاوید باجوہ، معاونین خصوصی ڈاکٹر فردوس عاشق اعوان، ڈاکٹر ثانیہ نشتر، سیکرٹری خزانہ، چیرمین پاکستان ہاوسنگ اتھارٹی اور چیرپرسن ایف بی آر نے شرکت کی۔

اجلاس میں ویڈیو لنک کے ذریعے گورنر اسٹیٹ بینک رضا باقر, وزیر خزانہ پنجاب مخدوم ہاشم جواں بخت، وزیر خزانہ خیبر پختونخوا تیمور سلیم خان بھی شریک ہوئے ۔

(جاری ہے)

اجلاس میں کرونا وائرس کے پیش نظر مجموعی ملکی معاشی صورتحال کا جائزہ، وبائی صورتحال کے نتیجے میں معیشت پر اثرات اور عوام الناس خصوصا غریب اور کم آمدنی والے طبقوں کو اس صورتحال میں حکومت کی جانب سے ریلیف فراہم کیے جانے کے حوالے سے ممکنہ آپشنز اور تجاویز پر تفصیلی غور کیا گیا۔

اس موقع پر وزیر اعظم عمران خان نے کہا کہ موجودہ صورتحال کے پیش نظر کمزور طبقے کے تحفظ کے لیے حکومت ہر حد تک جائے گی۔انہوں نے کہا کہ انتظامی سطح پر ہر ممکنہ اقدام کو یقینی بنایا جائے گا تاکہ ذخیرہ اندوزی اور موجودہ صورتحال کا کوئی ناجائز فائدہ نہ اٹھا سکے۔ وزیر اعظم نے اس موقع پر ہدایت کی کہ اشیاء خوردونوش اور دوائیوں کی فراہمی میں کسی صورت رکاوٹ نہیں ہونی چاہیئے۔