Live Updates

پنجاب میں ٹی ایل پی کو جس طرح مریم نواز نے ہینڈل کیا وہ قابل تعریف ہے، وزیردفاع

ہمیں ریاست کا سافٹ اسٹیٹ امیج ختم کرنا ہوگا، پاکستان کو ایک ہارڈ اسٹیٹ کی شناخت بنانا ہوگی، پنجاب نے اس کی ابتدا کردی؛ بیان

ساجد علی ہفتہ 18 اکتوبر 2025 11:16

پنجاب میں ٹی ایل پی کو جس طرح مریم نواز نے ہینڈل کیا وہ قابل تعریف ہے، ..

اسلام آباد ( اُردو پوائنٹ اخبارتازہ ترین۔ 18 اکتوبر2025ء ) وزیردفاع خواجہ آصف کا کہنا ہے کہ پنجاب میں ٹی ایل پی کو جس طرح مریم نواز نے ہینڈل کیا وہ قابل تعریف ہے۔ اس حوالے سے اپنے ایک بیان میں انہوں نے کہا کہ پنجاب میں ٹی ایل پی کے بلوے اور لا قانونیت سے جس طرح وزیر اعلیٰ مریم نواز کی قیادت میں انتظامیہ نے ہینڈل کیا ہے وہ قابل تعریف ہے، ٹی ایل پی کے متعلق جس طرح پنجاب حکومت کی طرف سے فیصلہ کن رویہ اپنایا گیا ہے دیگر حکومتوں کو بھی اس طرح کی تمام تنظیموں سے ڈیل کرنے کی حکمت عملی میں پنجاب کی تقلید کرنی ہوگی۔

وزیردفاع کا کہنا ہے کہ وزیراعظم شہباز شریف کی صدارت میں ہونے والے اجلاس میں، جس میں فیلڈ مارشل عاصم منیر اور عسکری قیادت، صوبائی وزیر اعلیٰ اور گلگت بلتستان و آزاد کشمیر کے وزراء بھی موجود تھے، اس اجلاس میں دہشت گردی اور دوسرے مسائل پہ بغیر ابہام کے اور پورے اعتماد سے اظہار خیال کیا گیا، پاکستان کو ایک قومی لائحہ عمل تشکیل کرنا ہوگا، ہمیں ریاست کا سافٹ اسٹیٹ امیج ختم کرنا ہوگا اور پاکستان کو قانون و آئین کے مطابق ایک ہارڈ اسٹیٹ کی شناخت بنانا ہوگی، پنجاب نے اس کی ابتداء کر دی ہے۔

(جاری ہے)

بتایا گیا ہے کہ پنجاب کابینہ نے ٹی ایل پی پر پابندی لگانے کی منظوری دے دی اور اس حوالے سے سمری بھی وفاق کو بھجوا دی گئی، صوبائی وزیر اطلاعات پنجاب عظمیٰٰ بخاری نے کہا ہے ک ایک مذہبی جماعت کے احتجاج کا کوئی جواز نہیں، پُرتشدد احتجاج کرنے والے ملک اور عوام کے ہمدرد نہیں ہوسکتے، غزہ کے نام پر احتجاج کی کال دی گئی، احتجاج کی کال غزہ امن معاہدے کے بعد دی گئی، احتجاج کے نام پر سڑکیں اور راستے بند کرنے کی اجازت نہیں دی جاسکتی، کیا پولیس کی گاڑیاں جلانے سے غزہ کا مسئلہ حل ہوگیا؟ ریاست نے فیصلہ کیا ہے کہ پاکستان ایسے احتجاج کا متحمل نہیں ہوسکتا۔

صوبائی وزیر کا کہنا تھا کہ ہڑتال کی کال مسترد کرنے پر تاجر برادری اور عوام کا شکریہ، پاکستان کے عوام باشعور ہیں جو کسی بہکاوے میں نہیں آئیں گے کیوں کہ یہ مذہبی نہیں انتہا پسند جماعت ہے، اس انتہا پسند جماعت کے تمام بینک اور سوشل میڈیا اکاؤنٹس کو سیل کر دیا جائے گا، اکاؤنٹس کو سیل کرنے کا کام کافی حد تک ہو چکا ہے، بانی پی ٹی آئی کے ٹوئٹر اکاؤنٹ پر 400 نعشیں گرنے کا ذکر کیا گیا، پنجاب حکومت پیکا ایکٹ کے تحت کارروائی کرے گی۔