پاکستان میں کورونا سے متاثرہ کیسز کی تعداد میں مزید اضافہ ہوگیا

اسلام آباد (اردوپوائنٹ اخبارتازہ ترین۔ 23 مارچ 2020ء) پاکستان میں کورونا وائرس کے کیسز کی تعداد میں مزید اضافہ ہو گیا، گزشتہ 24 گھنٹوں میں 99 نئے کورونا کيسز رپورٹ ہوئے، ملک بھر میں کورونا وائرس سے متاثرہ مریضوں کی تعداد 875 ہوگئی ہے۔ نیشنل کمانڈ اینڈ کنٹرول سینٹر کے کورونا وائرس کے حوالے سے تازہ ترین اعدادوشمار کے مطابق پاکستان میں کورونا وائرس کے مریضوں کی تعداد بڑھنے لگی، گزشتہ 24 گھنٹوں کے دوران کورونا وائرس کے 99 نئے کيسز رپورٹ ہوئے۔

جس کے ساتھ پاکستان میں کورونا وائرس کیسز کی تعداد 875 ہوگئی ہے۔ پاکستان میں سب سے زیادہ کیسز صوبہ سندھ میں رپورٹ ہوئے۔ سندھ میں کورونا کیسزکی تعداد 394 ہوگئی ہے۔ پنجاب میں کورونا وائرس کیسز کی تعداد 246، بلوچستان میں110، گلگت بلتستان میں تعداد71، خیبرپختونخواہ میں38، اسلام آباد میں15 اور آزاد کشمیر میں ایک کیس رپورٹ ہوا ہے۔

(جاری ہے)

نیشنل کمانڈ اینڈ کنٹرول سینٹر نے بتایا کہ اب تک کورونا وائرس سے متاثرہ6 افراد زندگی کی بازی ہارگئے ہیں۔

جبکہ کورونا وائرس کے6 مریض صحت یاب ہوچکے ہیں۔ دوسری جانب کورونا وائرس سے متعلق اٹھائے گئے اقدامات پر عمل کروانے کیلئے وفاقی اور صوبائی حکومتوں نے فوج طلب کرلی ہے۔ جبکہ پنجاب، سندھ، گلگت بلتستان اور آزاد کشمیر میں لاک ڈاؤن کردیا گیا ہے۔ مزید برآں ترجمان پاک فوج میجر جنرل بابرافتخار نے پریس کانفرنس میں قوم کو آگاہ کیا کہ آرمی چیف کی زیرصدارت کل کورکمانڈر کانفرنس میں تمام چیلنجز کا جائزہ لیا گیا ہے۔

ترجمان پاک فوج نے کہا کہ افواج پاکستان اپنی ذمہ داریوں سے آگاہ ہے، دنیا کے ترقی یافتہ ممالک کورونا کے سامنے بے بس ہیں،ہمیں محفو ظ پاکستان کیلئے یکجا ہونے کی ضرورت ہے۔انہوں نے کہا کہ وفاق اور صوبائی حکومتوں نے افواج پاکستان کو طلب کرلیا ہے۔ جس کے تحت سویلین کی بھرپور مدد کی جائے گی۔ ملک بھر میں جہاں فوج کو طلب کیا گیا ہے وہاں کھانے پینے کی اشیاء اور دکانیں کھلی رہیں گی، سینما ہالز، ہر قسم کی پبلک ٹرانسپورٹ بند رہے گی۔

تمام اسکول بند رہیں گے، تمام قسم کے شاپنگ مالز، عوامی مقامات ،اجتماعات اور غیرضروری نقل وحرکت پر پابندی رہے گی، تمام ایئرپورٹس انٹرنیشنل پروازوں کیلئے 4 اپریل تک بند رہیں گے، پٹرول پمپس اور منڈیاں صوبائی حکومتوں کی ہدایت پر ہی کھلیں گی، اس حوالے سے صوبائی حکومتیں مزید ہدایات دیں گی۔ انہوں نے کہا کہ کورونا وائرس کے باعث تمام سرحدیں توسیل کردی گئی ہیں، لیکن اصل سرحد انسان اور کورونا وائرس کے درمیان ہے۔

انہوں نے کہا کہ اب تک ایک ملین مسافروں کی اسکریننگ کی گئی ہے، اسکریننگ کا عمل جاری رہے گا۔ تمام حفاظتی اقدامات کو یقینی بنایا جارہا ہے۔ کورونا سے بچنے کیلئے نقل وحرکت کو محدود رکھنا ہوگا۔ ترجمان پاک فوج نے کہا کہ آرمی چیف اپنی ایک ماہ کی تنخواہ کورونا فنڈ میں دیں گے۔ بریگیڈیئر سے لیفٹیننٹ جنرل رینک تک تین دن کی تنخواہ اور کرنل کے عہدوں تک کے افسران نے2 دن اور نچلے گریڈ کے تمام عہدیدران نے اپنی ایک دن کی تنخواہ کورونا فنڈ میں دینے کا فیصلہ کیا ہے۔