کڑے وقت میں قوم اور ملک کی نگہبانی اور مفادات کے تحفظ کے لئے کاوشیں کریں، نوازشریف کی رہنمائوں اور کارکنوں کی ہدایت

اسلام آباد (اُردو پوائنٹ اخبارتازہ ترین - این این آئی۔ 25 مارچ2020ء) پاکستان مسلم لیگ (ن) کے قائد نوازشریف نے (ن)لیگی قیادت ، رہنمائوں اور کارکنوں کو ہدایت کی ہے کہ موجودہ صورتحال میں ملکر تاریخی کردار ادا کریں ،کڑے وقت میں قوم اور ملک کی نگہبانی اور مفادات کے تحفظ کے لئے کاوشیں کریںجبکہ پاکستان مسلم لیگ (ن) کے صدر اور قائد حزب اختلاف شہبازشریف نے کہاہے کہ کرونا نے پوری دنیا کو ہلا کر رکھ دیا ہے ،سیاسی نقصان ہوتا ہے تو ہوجائے ، ہم نے اپنے اصل ہدف پر نظر رکھنی ہے، ہم پاکستان کی خالق جماعت کے وارث ہیں ،انشاء اللہ آزمائش کی اس گھڑی میں بھی ہم کامیاب ہوں گے اور کسی قربانی سے دریغ نہیں کریں گے،ہم نے کورونا اور معیشت سے ہونے والی تباہی کی سونامی کے آگے بند باندھنے کے لئے ایک ٹھوس، قابل عمل اور جامع نیشنل ایکشن پلان دے دیا ہے، قومی حکمت عملی میں فنانشل ایمرجنسی کے نفاذ اور لاک ڈائون کی صورت میں عوام کو خوراک اور دیگر اشیائے ضروریہ پہنچانے کے لئے پروگرام مرتب کرنے کامطالبہ کرتے ہیں، حکومت اپوزیشن کی حکمت عملی پر عمل کر ے۔

(جاری ہے)

بدھ کو پارٹی اجلاس سے خطاب کرتے ہوئے اپوزیشن لیڈر شہباز شریف نے کہاکہ میں آپ کا شکر گزار ہوں کہ آپ سب اس مشاورت میں شامل ہوئے۔انہوںنے کہاکہ جیسا کہ آپ بخوبی آگاہ ہیں کہ ہمارے قائد جناب محمد نوازشریف کا دل کا انتہائی اہم اور حساس آپریشن ہونا ہے،میں ان کے علاج اور اس ضمن میں انتظامات میں مصروف عمل تھا۔ انہوںنے کہاکہ انشاء اللہ اس کی تیاریاں مکمل ہیں اور آئندہ ہفتے یہ آپریشن متوقع ہے،یہ ان کے علاج کے حوالے سے انتہائی اہم مرحلہ ہے،آپ سب کے لئے بہت دعاوں اور نیک تمناوں کا پیغام دیا۔

انہوںنے کہاکہ قائد محترم کا فرمانا ہے کہ وہ موجودہ صورتحال پر انتہائی دکھی ہیں کہ قوم کو مشکل اور ان صبرآزما حالات کا سامنا ہے، میری آپ سب سے عاجزانہ درخواست ہے کہ جناب محمد نوازشریف کی صحت کاملہ کے لئے خصوصی دعا فرمائیں۔ انہوںنے کہاکہ قائد محترم محمد نوازشریف کا آپ کے نام یہ بھی پیغام ہے کہ پاکستان مسلم لیگ (ن) کی قیادت، رہنما اور کارکنان مل کر ایک تاریخی کردار ادا کریں،اس کڑے وقت میں قوم اور ملک کی نگہبانی اور مفادات کے تحفظ کے لئے کاوشیں کریں۔

انہوںنے کہاکہ قوم کے ایک خادم، ایک رضاکار کے طورپر اپنا کردار ادا کرنا ہے۔انہوںنے کہاکہ کورونا نے پوری دنیا کو ہلا کر رکھ دیا ہے، قیمتی جانوں کو ضیاع ہورہا ہے۔ سوا ارب سے زیادہ آبادی اپنے گھروں میں بند ہے۔ شہباز شریف نے کہاکہ معیشت کی تباہی کورونا سے بھی بڑا خطرہ بن کر ظاہرہورہی ہے۔ انہوںنے کہاکہ پاکستان میں بھی کورونا کے مریضوں کی تعداد میں تیزی سے اضافہ ہورہا ہے جس پر پوری قوم پریشان اور مضطرب ہے، اس صورتحال کا تقاضا ہے کہ ہم مکمل قومی اتحاد، یک جہتی ، اخوت اور بھائی چارے کے عظیم جذبے پر کاربند ہوں،ہم نے سیاست اور سیاسی مفادات کو اس وقت ترجیح نہیں دینی۔

انہوں نے کہاکہ سیاسی نقصان ہوتا ہے تو ہوجائے لیکن ہم نے اپنے اصل ہدف پر نظر رکھنی ہے،اس وقت ہمارا اصل مقصد اپنی قوم کی بقاء کی جنگ ہے۔ انہوںنے کہاکہ ہم نے عوام کے خادم کا کردار ادا کرنا ہے،آج ہم نے بڑے بھائی، خیرخواہ کا کردار ادا کرنا ہے۔ انہوںنے کہاکہ یہ اجتماعی امتحان ہے،اس میں اجتماعی طورپر ہی ہم سرخرو ہوسکتے ہیں۔شہبازشریف نے کہاکہ پاکستان مسلم لیگ (ن) پر سب سے بھاری ذمہ داری عائد ہوتی ہے،ہم پاکستان کی خالق جماعت کے وارث ہیں،ہم قائداعظم کے سپاہی ہیں،ہم نے اس ارض وطن کے لئے ہمیشہ اپنا تن، من، دھن لگایا ہے۔

ہر قربانی دی ہے۔ انہوںنے کہاکہ انشاء اللہ آزمائش کی اس گھڑی میں بھی ہم کامیاب ہوں گے اور کسی قربانی سے دریغ نہیں کریں گے۔ انہوںنے کہاکہ مجھے آپ کو یہ بتاتے ہوئے خوشی محسوس ہورہی ہے کہ پاکستان مسلم لیگ (ن) نے باہمی مشاورت، غوروخوض، مختلف ماہرین کی تجاویز اور اپنے تجربے کی روشنی میں ایک جامع قومی حکمت عملی مرتب کی تاکہ اس وقت قوم کو جس خطرناک اور مخدوش صورتحال کا سامنا ہے، اس میں واضح راہ عمل متعین ہوسکے۔

انہوںنے کہاکہ ہم نے کورونا اور معیشت سے ہونے والی تباہی کی سونامی کے آگے بند باندھنے کے لئے ایک ٹھوس، قابل عمل اور جامع نیشنل ایکشن پلان دے دیا ہے۔ انہوںنے کہاکہ اس قومی حکمت عملی میں فنانشل ایمرجنسی کے نفاذ کا مطالبہ کیاگیا ہے۔ اپوزیشن لیڈر نے کہاکہ لاک ڈائون کی صورت میں عوام کو خوراک اور دیگر اشیائے ضروریہ پہنچانے کے لئے پروگرام مرتب کرنے کا مطالبہ کیاگیا ہے۔

انہوںنے کہاکہ مالی، انتظامی اور دیگر متعلقہ تمام پہلووں کے حوالے سے سفارشات دی گئی ہیں۔ انہوںنے کہاکہ اللہ تعالی کا شکر ہے کہ اپوزیشن کی تمام جماعتوں کی قیادت سے گزشتہ روزجو مشاورت ہوئی، اس میں پاکستان مسلم لیگ (ن) کی تیار کردہ قومی حکمت عملی کی مکمل تائید کرتے ہوئے اسے منظور کرلیاگیا۔ انہوںنے کہاکہ جا طورپر ہم یہ کہہ سکتے ہیں کہ پاکستان مسلم لیگ (ن)کے فعال کردار کی وجہ سے حکومت کو اقدامات کرنے پڑے ہیں جو اب تک خواب غفلت کا شکار تھی اور لیت ولعل سے کام لیاجارہا تھا۔ انہوںنے کہاکہ قومی حکمت عملی اب پوری اپوزیشن کی حکمت عملی ہے جسے ہم حکومت کو پیش کررہے ہیں کہ اس پر فی الفور عمل کیاجائے۔