وزیر اعلیٰ عثمان بزدار سے عبدالعلیم خان کی ملاقات ، گندم ، آٹے کے سٹاک و قیمتوں اور سیاسی صورتحال پر تبادلہ خیال

وزیراعلیٰ عثمان بزدار کا آٹے کی قیمتوں میں خود ساختہ اضافہ کرنے والے عناصر کے خلاف بلاامتیازکارروائی کی ہدایت مایوس عناصر کی اے پی سی بھی مایوس کن رہی، اپوزیشن جماعتوں نے قومی مفادات کو یکسر فراموش کیا،عثمان بزدار نوٹیفائیڈریٹ پر آٹے کی دستیابی یقینی بنانے کیلئے انتظامی اقدامات اٹھائے گئے ہیں،عبدالعلیم خان

منگل 22 ستمبر 2020 23:24

لاہور۔ (اُردو پوائنٹ اخبارتازہ ترین - اے پی پی۔ 22 ستمبر2020ء) وزیر اعلیٰ پنجاب سردار عثمان بزدار سے وزیراعلیٰ آفس میں سینئر صوبائی وزیر عبدالعلیم خان نے ملاقات کی ،جس میں باہمی دلچسپی کے امور، گندم ، آٹے کے سٹاک و قیمتوں اور سیاسی صورتحال پر تبادلہ خیال کیا گیا۔وزیراعلیٰ عثمان بزدار نے آٹے کی قیمتوں میں خود ساختہ اضافہ کرنے والے عناصر کے خلاف بلاامتیازکارروائی کی ہدایت کرتے ہوئے کہا کہ آٹے کی قیمتوں میں استحکام کیلئے ہر ضروری اقدام اٹھایا جائے اورمتعلقہ حکام مارکیٹوں اوربازاروں میں جاکر خود صورتحال کا جائزہ لیں۔

وزیراعلیٰ نے اپوزیشن کی اے پی سی کو ناکام ڈرامہ قرار دیتے ہوئے کہا کہ اپوزیشن نے ایک بار پھر ثابت کیا ہے کہ وہ صرف ذاتی مفادات کا تحفظ چاہتی ہے۔

(جاری ہے)

مایوس عناصر کی اے پی سی بھی مایوس کن رہی۔ انہوںنے کہا کہ اپوزیشن جماعتوں نے قومی مفادات کو یکسر فراموش کیا۔ قوم کا پیسہ لوٹنے والے اے پی سی کے ناٹک کے ذریعے عوام کو گمراہ نہیں کر سکتے۔ عوام باشعور ہیں اور نا اہل و کرپٹ چہروں سے اچھی طرح واقف ہیں۔

باشعور عوام کو مسترد شدہ عناصر دھوکہ نہیں دے سکتے۔انہوںنے کہا کہ اپوزیشن جماعتیں ملک کی ترقی و خوشحالی روکنے کے درپے ہیں۔ یہ عناصر ملکی ترقی کی راہ میں روڑے اٹکانے کی کوشش کر رہے ہیں۔اپوزیشن کا منفی کردار افسوسناک ہے۔ ماضی کی طرح اے پی سی کا یہ ڈرامہ بھی ناکام رہا۔ سینئر صوبائی وزیرعبدالعلیم خان نے کہا کہ محکمہ خوراک آٹے کی مناسب سپلائی کو ہر قیمت پر یقینی بنا رہا ہے اور نوٹیفائیڈریٹ پر آٹے کی دستیابی یقینی بنانے کیلئے انتظامی اقدامات اٹھائے گئے ہیں۔

محکمہ خوراک کے حکام آٹے کی قیمتوں کی تسلسل کے ساتھ مانیٹرنگ کر رہے ہیں۔ انہوںنے کہا کہ اے پی سی کے ذریعے اپوزیشن کی منفی سیاست آشکار ہو گئی۔انہوںنے کہا کہ اپوزیشن کی عوام میں رہی سہی ساکھ بھی مکمل طور پر ختم ہو چکی ہے۔