عوام کو مہنگائی کی وجہ سے تکلیف مجھے سب سے زیادہ محسوس ہوتی ہے،

لاہور(اُردو پوائنٹ اخبارتازہ ترین - این این آئی۔ 20 اکتوبر2020ء) وزیر اعظم عمران خان نے کہا ہے کہ عوام کو مہنگائی کی وجہ سے تکلیف مجھے سب سے زیادہ محسوس ہوتی ہے،عوام کو ریلیف فراہم کرنے میں کسی قسم کی کوتاہی برداشت نہیں کروں گا، ذخیرہ اندوزوں اور ناجائز منافع خوروں کے خلاف سخت ایکشن لیا جائے،عوام کو اشیا ئے ضروریہ کی وافر مقدار میں فراہمی اور منظور شدہ قیمتوں پر دستیابی یقینی بنائی جائے، راوی اربن ڈویلپمنٹ پراجیکٹ سے نہ صرف زر مبادلہ حاصل ہوگا بلکہ وسیع پیمانے پر روزگار کے مواقع بھی پیدا ہوں گے، منصوبے کی بر وقت تکمیل ہونی چاہیے اور اس ضمن میں ہر رکاوٹ کو فوری دور کیا جائے، تمام قانونی تقاضے پورے کیے جائیں اور مکمل شفافیت سے کام پورا کیا جائے۔

وزیر اعظم عمران کی زیر صدارت پنجاب میں بنیادی اشیا ئے ضروریہ کی قیمتوں اور دستیابی کا جائزہ لینے اورراوی اربن ڈیویلپمنٹ پراجیکٹ پر پیشرفت کے حوالے سے الگ الگ اجلاس ہوئے ۔

(جاری ہے)

اجلاس میں وفاقی وزرا ء شبلی فراز، سید فخر امام، مشیر شہزاد اکبر، وزیر اعلی پنجاب سردار عثمان بزدار، وزیر خزانہ پنجاب مخدوم ہاشم جواں بخت، مشیر وزیراعلی ڈاکٹر سلمان شاہ، چیف سیکرٹری پنجاب، سینئر ممبر بورڈ آف ریوینیو پنجاب، چیئرمین نیا پاکستان ہائوسنگ و ڈیویلپمنٹ اتھارٹی لیفٹیننٹ جنرل (ر)انور علی حیدر، چیئرمین راوی اربن ڈیویلپمنٹ اتھارٹی،صدر بینک آف پنجاب، نائب چیئرمین لاہور ڈیویلپمنٹ اتھارٹی، کمشنر لاہور ،ایڈیشنل آئی جی سپیشل برانچ پولیس، صوبائی وزارتوں بشمول زراعت، صنعت، اطلاعات، خزانہ، بلدیات، خوراک کے سیکرٹریز ، کین کمشنر، ڈائریکٹر فوڈاور دیگر سینئر افسران شریک ہوئے۔

وزیر اعظم کو بنیادی اشیائے ضروریہ کی قیمتوں اور دستیابی کے حوالے سے تفصیلی بریفنگ دی گئی۔اجلاس کو بتایا گیا کہ صوبہ بھر میں سہولت بازار قائم کیے جارہے ہیں جن میں کم قیمت پر اشیا ء فراہم کی جائیں گی،فورکاسٹنگ سیل اشیا ء کی طلب کو مسلسل مرتب کرتا ہے،اجلاس کو آگاہ کیا گیا کہ ذخیرہ اندوزی اور ناجائز منافع خوری کی مانیٹرنگ سیکرٹریز اورضلعی انتظامیہ کرے گی جن کی معاونت ٹائیگر فورس بھی کرے گی۔

چیف سیکرٹری نے یقین دہانی کرائی کہ صوبہ میں گندم اور آٹے کی قلت نہیں ہوگی۔وفاقی وزیر سید فخر امام نے بتایا کہ پنجاب کی آبادی کو ملحوظ خاطر رکھ کر گندم کی فراہمی یقینی بنائی جائے گی۔درآمد شدہ گندم میں سے پنجاب کو اب تک 57,000 ٹن مل چکی ہے۔وزیر اعظم عمران خان نے کہا کہ گندم اور اشیا ئے ضروریہ کی خریداری کو منصوبہ بندی کے تحت یقینی بنایا جائے تاکہ کمی اور مہنگائی کی صورتحال پیدا نہ ہو، جدید ٹیکنالوجی کا استعمال کیا جائے اور کاشت کاروں کو پیداوار بڑھانے کے لیے سہولیات فراہم کی جائیں۔

انہوں نے کہا کہ عوام کو مہنگائی کی وجہ سے تکلیف مجھے سب سے زیادہ محسوس ہوتی ہے ،ہمارے ملک کو خدا تعالی نے ہر قسم کے وسائل سے نوازا ہے،ان وسائل کا فلاح عامہ کے لیے استعمال حکومت کی ذمہ داری ہے۔ انہوں نے کہا کہ عوام کو ریلیف فراہم کرنے میں کسی قسم کی کوتاہی برداشت نہیں کروں گا۔ وزیر اعظم عمران خان نے تمام انتظامی افسران کو ہدایت کی کہ ذخیرہ اندوزوں اور ناجائز منافع خوروں کے خلاف سخت ایکشن لیا جائے،عوام کو اشیا ئے ضروریہ کی وافر مقدار میں فراہمی اور منظور شدہ قیمتوں پر دستیابی یقینی بنائی جائے۔

راوی اربن ڈیویلپمنٹ پراجیکٹ پر پیشرفت کے حوالے سے منعقدہ اجلاس میں وزیر اعظم عمران خان کو منصوبے کے حوالے سے پیشرفت پر تفصیلی بریفنگ دی گئی۔وزیر اعظم عمران نے کہا کہ یہ منصوبہ پنجاب اور پورے پاکستان کے لیے اہم ہے،اس کی وجہ سے زر مبادلہ حاصل ہوگا اور روزگار کے مواقع پیدا ہوں گے،وزیر اعظم نے ہدایت کی کہ منصوبے کی بر وقت تکمیل ہونی چاہیے،اس ضمن میں ہر رکاوٹ کو فوری دور کیا جائے ، تمام قانونی تقاضے پورے کیے جائیں اور مکمل شفافیت سے کام پورا کیا جائے۔