سیالکوٹ الیکشن میں فتح، وزیراعظم عمران خان کی فردوش عاشق اعوان کو شاباش

پی ٹی آئی پنجاب سے ن لیگ کا مکمل صفایا کررہی ہے، فردوس عاشق اعوان نے الیکشن میں مافیا کے بڑے بت کو دھول چٹائی۔ وزیراعظم عمران خان کی فردوس عاشق اعوان سے گفتگو

ثنااللہ ناگرہ جمعرات 29 جولائی 2021 16:09

سیالکوٹ الیکشن میں فتح، وزیراعظم عمران خان کی فردوش عاشق اعوان کو شاباش

اسلام آباد (اردوپوائنٹ اخبارتازہ ترین۔ 29 جولائی2021ء) سیالکوٹ الیکشن میں فتح حاصل کرنے پر وزیراعظم عمران خان نے فردوش عاشق اعوان کو شاباش اور مبارکباد پیش کی ہے، انہوں نے کہا کہ پی ٹی آئی پنجاب سے ن لیگ کا مکمل صفایا کررہی ہے، فردوس عاشق اعوان نے الیکشن میں مافیا کے بڑے بت کو دھول چٹائی۔ تفصیلات کے مطابق وزیراعظم عمران خان نے معاون خصوصی اطلاعات پنجاب فردوس عاشق اعوان کو ٹیلی فون کیا، وزیراعظم نے ن لیگ کو شکست میں اہم کردار ادا کرنے پر فردوس عاشق اعوان کو شاباش اورمبارکباد پیش کی۔

وزیراعظم عمران خان نے فردوس عاشق اعوان کی انتھک محنت کو سراہا۔ وزیراعظم عمران خان نے کہا کہ فردوس عاشق اعوان نےپر عزم ہوکر الیکشن لڑا اور مافیا کے بڑے بت کودھول چٹائی، یہ پی ٹی آئی کیلئے بہت بڑی کامیابی ہے، وزیراعظم عمران خان نے کہا کہ پی ٹی آئی پنجاب سے ن لیگ کا مکمل صفایا کررہی ہے۔

(جاری ہے)

معاون خصوصی فردوس عاشق اعوان نے کہا کہ وزیراعظم عمران خان اور وزیراعلیٰ عثمان بزدار نےمجھ پر اعتماد کیا، ایم ایل اے 36 اور پی پی 38 کا اہم ٹاسک سونپا جس پر میں شکرگزار ہوں، پی ٹی آئی کامیابی کا یہ تسلسل جاری رکھے گی۔

یاد رہے تحریک انصاف کے امیدوار احسن سلیم بریار نے پنجاب اسمبلی کے حلقہ پی پی 38 سیالکوٹ کے ضمنی انتخاب میں کامیابی حاصل کی ہے۔ حلقے میں پولنگ صبح 8 بجے شروع ہوئی جو بغیر کسی وقفے کے شام 5 بجے تک جاری رہی۔ ووٹنگ سے قبل بارش کے باعث بعض مقامات پر عملے کو مشکلات کا سامنا کرنا پڑا جس سے پولنگ کا عمل متاثر بھی ہوا۔ پاکستان تحریک انصاف کے امیدوار احسن سلیم بریار نے ضمنی الیکشن میں کامیابی حاصل کی ہے۔

پی پی 38 کے تمام 165 پولنگ اسٹیشنز کے غیر حتمی و غیر سرکاری نتائج کے مطابق تحریک انصاف کے احسن سلیم بریار60588 ووٹ لے کرکامیاب قرار پائے جبکہ پاکستان مسلم لیگ (ن) کے طارق سبحانی کو 53471 ووٹ ملے۔غیر حتمی و غیر سرکاری نتائج کے مطابق تحریک انصاف کے امیدوار نے لیگی امیدوار کو 7117 ووٹوں سے شکست دی۔خیال رہے کہ یہ نشست ن لیگ کے خوش اختر سبحانی کے انتقال کے باعث خالی ہوئی تھی۔