پاکستان اور چین آئرن برادرز ہیں دشمن قوتیں ہمارے تعلقات کمزور نہیں کر سکتیں.عمران خان

اسلام آباد(اردوپوائنٹ اخبارتازہ ترین-ا نٹرنیشنل پریس ایجنسی۔13 اگست ۔2021 ) وزیراعظم عمران خان نے کہا ہے کہ پاکستان اور چین آئرن برادرز ہیں دشمن قوتیں ہمارے تعلقات کمزور نہیں کر سکتیں یہ بات انہوں نے اسلام آباد میں چینی سفیرنونگ ژونگ نے وزیراعظم عمران خان سے ملاقات کی جس میں دوطرفہ تعلقات، سی پیک ،کورونا ویکسین اورمختلف شعبوں میں تعاون پرتبادلہ خیال کیا گیا.

چینی سفیر نے وزیراعظم عمران خان کو چینی صدر کی جانب سے یوم آزادی کی مبارک باد دی وزیراعظم ہاﺅس سے جاری اعلامیہ کے مطابق وزیراعظم نے چینی قیادت کے پیغامات کا گرمجوشی سے خیرمقدم کیا اور کورونا کے دوران ویکسین کی فراہمی پر چین کاشکریہ ادا کیا.

(جاری ہے)

وزیراعظم عمران خان نے کہا کہ سی پیک خطے میں تبدیلی کے لیے بہترین منصوبہ ہے ملاقات میں خطے کی صورتحال پربھی تبادلہ خیال کیا گیا وزیراعظم نے کہا کہ افغان تنازع کا فوجی حل نہیں ہے پاکستان افغانستان تنازع کا حل سیاسی مذاکرات سے چاہتا ہے.

قبل ازیں نادرا ہیڈکواٹرزمیں تقریب سے خطاب کرتے ہوئے وزیراعظم عمران خان نے کہاکہ ان کی حکومت پہلی مرتبہ پاکستان میں ایسے انتخابات کروائے گی جس کے نتائج سب قبول کرلیں گے انہوں نے کہا کہ ملک میں 33 لاکھ افغان پناہ گزین موجود ہیں لیکن ان کے علاوہ بھی بہت سے ایسے لوگ ہیں جو غیر رجسٹرڈ ہیں. انہوں نے کہا کہ جن کے پاس کوئی شناخت نہ ہو وہ نان سیٹیزن بن جاتے ہیں، نادرا جو ایلین رجسٹریشن کارڈز جاری کررہا ہے اس کی وجہ سے وہ مرکزی دھارے میں آجائیں گے انہوں نے کہا کہ اس کارڈ کی مدد سے وہ کاروبار کرسکیں گے، بینکوں میں پیسے رکھوا سکیں گے اور معیشت کا حصہ بن جائیں گے اور غیر قانونی کاموں سے بچیں گے.

وزیراعظم نے کہا کہ میں سمجھتا ہوں کہ جو فراڈ معاشرے میں اور انتخابات میں ہوتا ہے ان سب کا حل ٹیکنالوجی ہے انہوں نے کہا کہ ڈیٹا اور ٹیکنالوجی دونوں کے استعمال سے ہم پہلی مرتبہ پاکستان میں ایسا الیکشن کروائیں گے جس کے نتائج سب قبول کرلیں. انہوں نے کہا کہ اس کی وجہ یہ ہوگی کہ ٹیکنالوجی کو ڈیٹا سے منسلک کردیں گے اور ٹھپے لگانا، بیلٹ باکس بھرنا، ایک ایک گھر سے 100، 100 جعلی ووٹس رجسٹرڈ کرانے جیسے تمام کام ختم ہوجائیں گے وزیراعظم نے کہا کہ جیسے ہی الیکٹرانک ووٹنگ مشینز آجائیں گی اس کے ساتھ نادرا کا ڈیٹا ٹیلی کر کے ہم بالکل اکیسیوں صدی کا الیکشن کروائیں گے.

وزیراعظم ہاﺅس سے جاری بیان کے مطابق وزیراعظم عمران خان نے نادار ہیڈکوارٹرز کا دورہ کیا، اس موقع پر وزیراعظم نے نادرا کی نئی موبائل رجسٹریشن وین منصوبے کا افتتاح کیا دورے کے موقع پر وزیراعظم کو ایلین رجسٹریشن کارڈز، پاک کووڈ 19 موبائل ویکسینیشن پاس، قومی تصدیق و تجدید مہم اور نئے نادرا رجسٹریشن سینٹرز/نئی موبائل رجسٹریشن وین کے اقدامات کے بارے میں بریفنگ بھی دی گئی وزیراعظم اس موقع پر نادرا کے نیشنل ڈیٹا وئیر ہاﺅس اور آپریشن روم کا بھی دورہ کیا.